Aımaqta qandaı habar bar?
Zaýyttyń "ıi qanady"
Arqalyq. Eski bylǵary zaýyty qaıta jandanady. Ol buǵan deıin 125 mln teńge qaryzǵa batyp, turalap qalǵan edi. Zaýyttyń "boıyna qan júgirtý" úshin 2019-2020 jylǵa jospar quryldy. 2 jyldan soń tolyq qýatpen jumys istemek. Mamandar sózinshe, kásiporyn qýattylyǵy aıyna 40 myń, jylyna 500 myń teri bolýy múmkin. Munda shıkizat óńdelip qana qoımaı, daıyn bylǵarylar saýdaǵa shyqpaq. Tıisinshe, sapaly ónimge ishki naryqtan ǵana emes, Reseı, Ispanııa, Italııa tarapynan suranys týyp otyr. 
Saıabaqty ustaý kerek aıalap
Lısakov. Áskerı komıssarıat aýdanyndaǵy qaraǵaıly baq abattandyrylady. "Nashaqorlar saıabaǵy" dep atalyp ketken bul jer qoǵamdyq demalys ornyna aınalady. Bul iske "Shaımerden" AQ bilek sybana kirispek. Saıabaqta jaıaý júrginshiler joly, shamdar, oryndyqtar, qoqys salǵyshtar jáne sport zonasy men júgiris alańy paıda bolady.
Júzege asar joba kóp
Áýlıekól. Amanqaraǵaıda memlekettik tilde jalpy bilim beretin 320 oryndyq mektep qurylysy bastalady. Qurylysqa 1 mlrd 172 mln teńge jumsalmaq. Sondaı-aq, aýdandyq mańyzdaǵy Lavrent'ev-Pervomaı-Prıozernyı-Bol'shoı Chýrakov avtojolyna ortasha jóndeý júrgiziledi. Munyń syrtynda Amanqaraǵaı aýylyna sý qubyryn salý jumystary qolǵa alynbaq. Bul joba quny – 2,5 mlrd teńge.
