Жарқыра, жаңа жыл шыршасы!

by Qostanaı tańy · 20.12.2018

Қостанайдың орталық алаңында жаңа жылдық бас шыршаның шамдары салтанатты түрде жағылды. Қала тұрғындары да мерекелік іс-шараға көптеп жиналды. Сондай-ақ, салтанатты жиынға Қостанай қаласының ұжымдары мен оқу мекемелерінің өкілдері қатысты. Облыс әкімі Архимед Мұхамбетов тұрғындарды келе жатқан Жаңа жылмен құттықтады.

–Егер 2018 жылдың қорытындысын шығарсақ, осы жыл жақсы өтті. Барлық бағыттар бойынша біз дамудың оң динамикасын көріп отырмыз. Біздің тұрғындардың әл-ауқаты жақсаруда: тұрғын үй мәселесі, жолдар, медициналық сала. Көптеген ауылға газ тартылды. Келер 2019 жылдан да күтеріміз мол. Жаңа жыл – әр отбасына жылулық әкелетін, көңілге үміт пен сенім ұялатып, шапағат пен шаттық, мейірім мен ізгілік сыйлайтын ғажайыпқа толы мереке! Жаңа жыл әрбір отбасыға бақыт, табыс әкелсін. Баршаңызға жақсылық, ең ізгі тілектердің орындалуын тілеймін, – деді облыс әкімі Архимед Бекежанұлы.

Облыс әкімі құттықтау сөзінен кейін бас шыршаның шамын жақты. Жылдағы дәстүрге сай, бас шырша жанында мерекелік қойылым қойылды. Аяз ата мен Ақшақар және ертегі кейіпкерлері қала тұрғындарына ерекше көңіл-күй сыйлады. Шараға жиналған жұртшылық мерекелік бағдарламадан бөлек отшашуды тамашалады. Іс-шара соңы мерекелік концертке ұласты.