450 пәтер кілті табысталды

Бүгін, ҚР тұңғыш президенті күні Қостанай қаласындағы "Юбилейный" және "Әуежай" шағын аудандарында 450 пәтер пайдалануға берілді. Оның 250-нің кілтін облыс әкімі Архимед Мұхамбетов тұрғындарға өз қолымен табыстады. 

 

Қыстың алғашқы күні осынша тұрғын жылы да жайлы пәтер иесі атанып отыр. Облыс әкімі Архимед Мұхамбетов әуелі "Юбилейный" шағын ауданына барып, №39 жаңа үйдің заңды иелерін құттықтап, 100 кілтті қоныстанушыларға өз қолымен тапсырды.

 

 

 

– Бұған дейін бос жатқан бұл аудандағы құрылыс қарқынды жүріп жатыр. Бас мердігер – "БК Строй" компаниясы. Жергілікті атқарушы билік инженерлік-коммуникациялық желілердің сапалы тартылуына барынша атсалысуда. Оған қазынадан 4 млрд теңге қарастырылған. Тек қана қазандықтың өзіне 1 млрд шығындалады. Міне, осындай жұмыстардың бүгінгі нәтижесі – алғашқы 100 пәтерлі тұрғын үй. Ал, жалпы, осы шағын ауданда 47 көп қабатты жаңа баспана тұрғындарға берілетін болады. Әлеуметтік нысандардың құрылысы да екпінді. Жастар сарайы, мұзды-спорттық сарай салынып жатыр. Келесі жылы 1200 балаға арналған мектептің құрылысы басталады. Құны – 3 млрд 200 млн теңге. Бастапқы қаржы 2019 жылы бөлінеді. Әзірге, сіздерді бүгінгі үлкен қуаныштарыңызбен шын жүректен құттықтаймын, – деді А.Мұхамбетов.Жалпы, бұл тұрғын үйге халықтың қолының жетуі "Нұрлы жер" бағдарламасы аясында мүмкін болып отыр. Облыс әкімінің мәліметінше, "Нұрлы жерге" қарасты  "7-20-25" бағдарламасы шеңберінде облыста 300 мың шаршы метр жерге баспана тұрғызылатын болады. Ол бұл көрсеткіштің 2017 жылмен салыстырғанда 10% артқанын да өз сөзінде айтып өтті. Одан әрі пәтер кілтін табыстау салтанатына кезек беріліп, рәсім сүт пісірім уақытқа ұласты.

 

Ізін ала аймақ басшысы "Әуежай" шағын ауданында игілікке куә болғалы отырған 150 тұрғынның қуанышын бөлісуге барды. Мұнда бірден екі баспананың іші жанға толды. №26 және №33 үйлердің құрылысы өткен жылдың маусым айында басталған еді. Сапалы да сәнді салынған 9 қабатты қос үй көп тостырмай иелерін тапты. Қоныстанушылардың "Тұрғын үй құрылыс жинақ банкі" АҚ салымшылары екенін айта кеткен жөн.

Қуанышы қойнына сыймай жүрген жандардың бірі – Игорь Қайдарұлы. 27 жастағы Науырзым ауданының тумасы тәртіп сақшысы болып қызмет етеді. 

– Бұл күнді көптен күткен едім. Алайда жас күнгі арманымды небәрі 3 жылда жүзеге асыру мүмкін болды. Ең әуелі анам мен артымнан ерген үш бауырымды қуантқаныма разымын. Өзім қызмет бабымен Тобыл стансасына ауысқандықтан, аталған жақындарым осы шаңырақты қоныстанатын болады. Бұдан кейін "үйленсем" деген арманыма қол созым қалғанымды жасырмаймын. Халыққа қолайлы мүмкіндіктер жасап бергені үшін елдің жанашыр ағаларына айтар алғысым шексіз, – дейді қазақ жігіт.

Басты қайғысы басыбайлы баспана болып жүрген талай қостанайлықтың қуанышын таяу келешекте әлі де бөлісерміз. Мақаланы газеттің алдағы санынан толығырақ оқи аласыздар.

 

Ж.Жүсіпбек

Суреттерді түсірген автор