Бүгін білім күні
Қостанайдағы №3 мектеп-гимназиясында Білім күніне арналған салтанатты жиналыс өтті. Алғашқы қоңырау мерекесіне жиналған оқушылар мен ата-аналарды облыс әкімі Н.Садуақасов арнайы құттықтады.
Мұнтаздай болып киінген оқушылар қолдарына құшақ-құшақ гүл алып ертемен мектепті бетке алды. Ата-аналар мен ұстаздардың да жүздерінен ерекше толқыныс байқалады. Бұл күні шаһарымыздағы КСК шағын ауданында орналасқан №3 мектеп-гимназиясының алды ерекше безендірілген. Түрлі-түсті шарлар мен әралуан гүлдер мектеп ауласын одан әрі ажарландыра түскен. Құлаққа жағымды әуен баяу ғана ойнап тұр. Бұл жердегі әрбір зат «Кел, балалар, оқылық» деп тұрғандай.
Көпшілік тағатсыздана күткен салтанатты жиналыс таңертеңгі сағат l0.00-де басталды. Алдымен еліміздің Әнұраны орындалып, биыл мектеп табалдырығын аттаған балақайлар мен он бірінші сынып оқушылары ортаға шықты. Шәкірттер дайындап келген тақпақтарын жатқа айтып, әннен шашу шашты.
Мерекеге арнайы шақырылған облыс әкімі жиналғандарды жаңа оқу жылымен құттықтады.
– Дәл бүгін облысымыздағы білім ошақтары есіктерін айқара ашты. Жаңа оқу жылында мектеп табалдырығын аттаған шәкірттер мен он бірінші сынып оқушыларын құттықтаймын. Патриотизм-Отанды сүюден басталады. Балақайлардың еліміздің нағыз патриоты болып өсуіне тілектеспін. Бүгінен бастап ұзстаздар үшін де жаңа оқу жылы басталды. Қостанайлық ұстаздар еліміздегі үздік оқытушылардың қатарында екенін дәлелдеп келеді. Сондықтан, биылғы жыл баршаңызға табысты болғай,-деді облыс әкімі Нұралы Садуақасов.
Мерекелік жиналыста мектеп директоры Ботакөз Нұрманова құттықтау сөзін сөйледі. Алғашқы қоңырау соғылып, оқушылар үйреніскен парталарына жайғасты. Облыс әкімі мектептің ішкі көрінісін тамашалап, сынып бөлмелерінің жаңа оқу жылына дайындығымен танысты.
Қаламыздағы №3 мектеп-гимназиясының іргетасы 42 жыл бұрын қаланған. Сол уақыттан бері он мыңдаған ұл мен қыз білім алып, үлкен өмірге қанат қақты. Қазіргі күні аталмыш мектепте 900 оқушы бар. Биыл мұнда күрделі жөндеу жұмыстары жасалған болатын.
Қымбат Досжанова
Суреттерді түсірген Бағдат Ахметбеков
