Қазақстан-Ресей көрмесі: Қостанай қолөнері қошеметке ие

Қызылжарда өтіп жатқан Қазақстан және Ресейдің 15-ші өңіраралық ынтымақтастық форумының екінші күні елбасы Нұрсұлтан Назарбаев пен Ресей президенті Владимир Путин келді. Қос елдің басшылары Теннис орталығында ашылған Қазақстан-Ресей туристік көрмесін аралап көрді. Көрмеге іргелес жатқан екі елдегі туризмді дамытудың жаңа жобалары, медициналық туризм мен Қазақстан мен Ресейдің таңдаулы туристік нысандары туралы толық ақпарат алуға болатын заманауи бейнеқұрылғылар қойылған.

Көрмеге Қостанай облысындағы Науырзым қорығы, «Сосновый бор», «Жайлау» шипажайлары мен туристердің аңға шығып, балық аулауына қолайлы Торғай өңірінің табиғатымен таныстыратын бейнематериалдар мен кітапшалар, жадынамалар мен жолсілтеуші нұсқаулықтар қойылған. Мұнда қазақ және орыс ұлттық қолөнер шеберлерінің бірегей туындылары да көпшілік назарына ұсынылған. Олардың ішінде қостанайлық шеберлер ағайынды Аңқауовтардың «Арлан-дизайн» авторлық интерьер дизайны студиясынан шыққан ұлттық бояуы қанық қолөнер бұйымдары мен Николай Рудень жасап шығарған ғажайып ағаш сағат та бар. Жерлестеріміздің бірегей туындыларына қызығушылар көп.

– Науырзым даласының тәккапар сұлулығы мен дархан кеңдігін суреттейтін бірнеше картинамды ресейліктер сатып алды. Бұл картиналар киіз өңдеу жолымен аппликация тәсілімен жасалған. Көбін осы технология қызықтырады, – дейді Арлан Аңқауов.

Жұрт қызығушылығын оятқан тағы бір қолөнер туындысы – қамырдан жасалған ханшайым. Ал Николай Руденьнің ағаш сағаты көрмеде 1 миллион теңгеге бағаланды. Сағаттың әрбір бөлшегін шебер қолдан жонып жасаған. Көрмені ұйымдастырушылар жүрісінен еш жаңылмайтын ерекше сағаттың екі-үш күн ішінде жаңа иесін тауып, сатылып кететініне сенімді.

 

Нұрқанат Құлабаев