Сәнді саябақ ашылды (ФОТОРЕПОРТАЖ)
Затобол кентінде "Жаңару" атты саябақ пайда болды. Оның ашылу салтанатына облыс әкімі Архимед Мұхамбетов арнайы қатысты.
Әдетте мұншама көп халық кент орталығына үлкен мерекелерде ғана жиылатын. Демек, жаңа саябақтың ашылуы тұрғындар үшін ерекше оқиға болды деуге болады. 
Сыйымдылық аясы кең, көркі көз тартатын сейіл-серуен зонасы Затоболдың Тәуелсіздік көшесі бойынан орын тепкен. 
Елді мекен тұрғындары мен қонақтарының қуанышын жергілікті өнерпаздар еселеп, ән-күйден шашу шашты. 
Аймақ басшысы А.Мұхамбетов "Жаңару" саябағының ашылуымен көпшілікті құттықтап, қала мәртебесін иеленгелі отырған кенттің әлі де ажарлана түсетінін айтты.
-Құрметті Затобол тұрғындары, сіздерді мұнда бұрын-соңды болмаған жаңа саябақтың ашылуымен шын жүректен құттықтаймын. Бұл әлеуметтік жобаның жүзеге асуы "Рухани жаңғыру" бағдарламасы аясында мүмкін болып отыр. Саябақтың негізін қалауға 240 млн теңге жұмсалып, құрылысымен "Жаңа өмір" мердігерлік компаниясы айналысты. Бұл тек серуен құру орны ғана емес, спорт алаңдары,скейтборд нысаны жұмыс істейтін болады. Бұдан былай мәдени-көпшілік шаралар да осы саябақта өтеді, – деді А.Мұхамбетов.
"Жаңарудың" ең ерек жаңалығы – биші субұрқақ. Жиылған жұрттың тағатсыз күткен сәті де сол еді – аймақ басшысы айрықша фонтанды өз қолымен іске қосты. 
Би-музыкалық субұрқақ жоғары атқақтап, қазақ күйімен ырғалып билей жөнелді. Ізін ала өзге әуендер де қосылды. Түрлі-түсті бояулармен құбылып, ырғаққа ілесіп мың бұралған көріністі көрермен жұрт көпке дейін көз алмай тамашалады. 
Бұл нысанның, расында да, затоболдықтардың жиі басын қосып, татулық-бірлігін нығайта түсетін сәнді саябаққа айналарына шүбә жоқ.
Суреттерді түсірген Бағдат Ахметбеков
