Жатақхана өртенді
Қостанай қаласында отбасылық жатақхана өртенді, деп хабарлайды ҚазАқпарат.
Г.Сәтжанова есімді оқиға куәгерінің сөзінше, өрт түн ортасында шыққан.
«Үйдің төменгі қабатынан ыстың иісі сезілді. Бастапқыда мән берген жоқпыз. Кенет айқай-шу басталып, тұрғындар өрттің басталғаны туралы дабыл қақты», – дейді куәгер.
Ақпаратты облыстық төтенше жағдайлар департаменті растады. Оқыс оқиға 21 тамыз күні сағат 00:39 шамасында болған.
«Қостанай қаласындағы 5 қабатты отбасылық жатақхананың 2-қабатынан өрт шықты. Пәтерден 2 бала құтқарылды. Барлығы 84 адам қауіпсіз жерге көшірілді. Оның ішінде 15 бала бар», – деді облыстық ТЖД баспасөз қызметіндегілер.
Ведомствода мәлім етілгендей, өрттің нақты себептері әлі анықталып жатыр. Бастапқы болжам бойынша,балалар отты абайсыз қолданған болуы мүмкін.
