Науқанға тас-түйін әзір 

     Облыс диқандары күзгі жиын-терім жұмыстарына әзір. Бұл туралы өңірдің ауыл шаруашылығы тауар өндірушілерімен өткен алқалы кеңесте мәлім болды.

     Жиында алдағы егін орағына әзірлік барысы туралы ауқымды баяндама жасаған облыс әкімінің бірінші орынбасары Ғауез Нұрмұхамбетовтың айтуынша, биылғы астықтың шығымы жаман емес. Орташа есеппен алғанда гектарына 12-13 центрерден айналуы ықтимал.

     Өңір диқандары егістікті әртараптандыруға ерекше ден қойып отыр. Мәселен, үстіміздегі жылы 4 млн 60 мың гектар алқапқа дән сіңірілсе, соның 430 мың гектары түрлі майлы дақылдардың еншісіне тиді.

       – Енді жерде өнген дәннің бір түйірін шашау шығармай жинап-теріп алу басты міндет саналады.  Сондықтан, жаз бойы облыс ауыл шаруашылығы тауар өндірушілері мүмкіндікті мүлт жібермеуге тырысты.  Цифрландыру аясында машина-трактор  алаңы жаңартылып, зиянкестермен күресте тың жүйелер қолданылды. Енді тамыз айының жиырмасына қарай диқандар егінге жаппай орақ салады, – деді Ғ.Нұрмұхамбетов.

      Науқандық жұмыстарға қажетті дизельдік отын жеткілікті. Техника сақадай сай. Егін орағына барлығы  жиырма мыңнан астам трактор мен мыңға жуық егістік кешендері жұмылдырылады.

     Облыс әкімі Архимед Мұхамбетов дала жұмыстары кезінде астық, жанар-жағар май  ұрлығына жол бермеуді қатаң тапсырды. Бұған аудан басшылары мен құқық қорғау органдарының жетекшілері тікелей жауапты болмақ.

 

Әлібек ЫБЫРАЙ

Суреттерді түсірген Бердіболат КӨРКЕМБАЕВ.