Скейт саябағы салынбақ
Қашар кентінің экстремалды жастары үшін жақсы жаңалық. Жақын арада олар да скейт тебу шеберліктерін арнайы жабдықталған орында шыңдауға мүмкіндік алады. Қала құраушы кәсіпорын – «ССКӨБ» АҚ басшылығы жас қашарлықтардың сұранысып ескеріп, 2-шағын ауданның аумағына скейт саябағын салуды жоспарлап отыр. Әзірге болашақ алаң орналасатын жерде дайындық жұмыстары қолға алынып, маркшейдерлік түсірілімдер жүзеге асырылуда.
Белгілі болғандай, осы жолы кен алыбы спорт нысанын өз жұмыскерлерінің күшімен салмақ. Олай дейтініміз, Рудныйдағы скейт саябағының құрылысы алматылық мердігерлерге сеніп таспырылған болатын. Дегенмен жергілікті мамандар алматылық әріптестерінен еш кем түспейді деген ойдамыз.
Болашақта Қашар кенті еліміздегі үлгілі елді мекендердің біріне айналмақ. Өйткені «ССКӨБ» АҚ мұндағы кеніштің аумағына байыту фабрикасы мен тағы да басқа маңызды нысандарды салуды көздеп отыр. Бұл, өз кезегінде, Қашардың әлеуметтік инфрақұрылымын дамытып, халықтың әл-ауқатын жақсартуға алып келетіні сөзсіз.
Қуаныш ЕСҚАБЫЛ
