Кеншілер қаласындағы шаһар тойы
Кеншілер қаласы Рудныйда ұлан-асыр той-думан. Орталық алаңда ерсілі-қарсылы жүрген дүйім жұрт. Бір-бірімен иін тірескен осы нөпір халықтың жүзінен шаттық, бақыт көрінеді. Тіпті, танымаса да жылы жүзбен амандасып, лебізін білдіріп, мәре-сәре боп, бірін-бірі құттықтап жатыр. Себебі, олар туған шаһарының 57 жылдығын және еліміздегі ең іргелі кәсіпорын Соколов-Сарыбай тау-кен байыту өндірістік бірлестігіне 60 жыл толу мерекесін осындай шат-шадыманды көңіл күймен атап өтуде. Бұл қуанышты күнді жергілікті халықпен өңір басшысы Нұралы Садуақасов та бөлісті.
– Алпыс жылға жуық тарихы бар Рудный шаһары бүгін 57 жылдық туған күнін атап өтуде. Еліміздің, облысымыздың экономикасының дамуына рудныйлықтар үлкен үлес қосуда. Қаланың көркі де күн сайын құлпырып, жаңарып келеді. Шағын және орта бизнес те өркендеп, құлашын кеңге жаюда. Күні кеше ғана Елбасымыз Нұрсұлтан Назарбаев Жезқазған-Бейнеу, Арқалық-Шұбаркөл шойын жолын іске қосты. Сол тарихи күнге бәріміз куә болдық. Бұл дегеніміз біздің облысты орталық Қазақстанмен, одан әрісі шетелмен жалғастыратын нағыз күретамырлы жол. Осы темір жолдың құрылысына 500 млрд. жуық теңге жұмсалыпты. Мұны шойын жолдардың ашылу салтанатында Елбасымыз мәлім етті. Міне, сондай тарихи күннен кейін Рудный қаласының да тойы тойлануда. Той тойға ұлассын, құрметті рудныйлықтар!,– деді Нұралы Садуақасов жергілікті халықты құттықтап.
Содан соң тойшы қауым көркемөнерпаздардың өнерін тамашалап, үсті-үстіне қол соғып, қошеметке бөлей түсті. Әсіресе, мың бұралған бишілердің белгілі бір символикаға құралып, көрсеткен қойылымы жиналған жұртты тіпті, риза етті. 
Сахнаға шыққан әрбір әртістің өнеріне алаңдап, әрі-сәрі күй кешіп жүрген қала әкімінің орынбасары Елена Скарединаны анадайдан көзіміз шалып қалды. Жанына жақындағанымыз сол еді, жатырқамай бірден ескі танысындай бізді әңгімеге тартты.
– Келгендеріңіз қандай жақсы болды. Осы тойға көптен дайындалған едік. Бұл тек қана рудныйлықтардың емес, барша ынтымағы жарасқан өңіріміздің тойы. Бұл кешегі қала құрылғанынан бергі уақытта басынан осы шаһардың толымды табысына қуанған, жетістігіне жігерлі еңбегін, күш-қайратын жұмсаған жандардың тойы. Өйткені, мен оны жақсы білемін. Себебі, мен осы шаһарда туып-өстім. Өмірдің ыстығы мен суығын осы шаһарда көрдім,– деді Елена Вадимқызы тебірене әңгімелеп.
Біз одан әрі ол кісіден тағы қандай қызықты бағдарламалар барын сұрадық. Сөйтсек, бұл тойдың ең қызығы ақшам уақытынан кейін басталып, соңы отшашуға ұласады екен. Сондай-ақ, тойдың құрметті қонағы ретінде ресейлік танымал әнші Полина Гагарина әннен шашу шашпақ.
…Міне, жүздері бал-бұл жанып, қуаныштары қойнына сыймай жүрген жергілікті жұрт жылына бір келетін шаһар тойын дәл осылай сән-салтанатымен атап өтпек! Иә, той тойға ұлассын, ағайын!
Нұрболат Мешітбаев
Суреттерді түсірген Бағдат Ахметбеков
