Оқыс жайтқа орын жоқ

Тасқын қаупі төнген сайын бақылау күшейді. Қатермен бетпе-бет келмеу үшін дайындық шаралары дамылсыз пысықталып жатыр. Әсіресе, су қоймалары мен бөгеттердің қалпы назарда ұсталуы керек. Осы мақсатта облыс әкімі Архимед Мұхамбетов Таран, Жітіқара аудандарына арнайы жұмыс сапарымен барды.

Аймақ басшысы ең әуелі Таран ауданына аялдап, Аят өзенінің жағасында салынып жатқан бөгеттің жай-күйімен танысты. Оның құрылысына облыс бюджетінен 116,4 млн теңге қаржы бөлінген. Жобаның жалпы құны – 270 783 мың теңге. Жұмыстар биыл қазан айында аяқталмақ. А.Мұхамбетов мерзімнен бұрын сапаға ден қоюды тапсырды. Бұл жерде аудан құтқарушылары мен техника сап түзесіпті. Олар табиғаттың тосын мінезіне тас-түйін дайын екендеріне сендірді.

Жітіқараның да жіті бақылауында бірнеше гидротехникалық нысан бар. Солардың бірі – Желқуар су қоймасы. Мұнда қызыл су қарқыны күшейіпті. Қойма арқылы арқырап ағып жатыр. Учаске басшының А.Мұхамбетовке берген ақпаратынша, бұл ағын Денисов ауданы арналарын көктеп өтіп, Тобыл өзеніне қосылады. Жауапты мекеме өкілдері мұндағы жағдайды ұдайы қадағалап отыр. Айта кетейік, бұл нысан республикалық және облыстық бюджет есебінен 2011-2013 жылдары салынған болатын.

Кезекті нысандар – төменгі және жоғарғы Шортанды су қоймалары. Бұл жерде де қызыл су деңгейі көтерілген. Дегенмен, таяудағы елді мекендерге келер қауіп жоқ. Оның үстіне, сонау 1962 жылы пайдалануға берілген қос қойма да биыл күрделі жөндеуден өтеді. Оған 154,4 миллион теңге қаржы қарастырылыпты.

 

 

– Елді мекендерге жақын орналасқан су қоймаларын сапалы етіп жөндеу үлкен жауапкершілікті талап етеді. Қауіпсіздікті осы бастан қамдау керек. Сондықтан, бұл екі су қоймасын жөндеу жұмыстары мамыр айынан басталады, – деді өз сөзінде өңір басшысы.

Жауапкершілікті мойнына алған мердігер компания құрылысты осы жылдың тамыз айында аяқтауға уәде етті.

       

Мұнан соң облыс әкімі Жітіқарада құрылысы қолға алынған бірқатар нысанға соқты. Жақын арада Жапон елшілігі қаражаты есебінен мүмкіндігі шектеулі балаларды күндіз қабылдайтын мекеме пайда болады.

Сондай-ақ, бұл ауданда бұрын-соңды болмаған спорттық-сауықтыру кешені бой көтермек.

 

Суреттерді түсірген Бердіболат Көркембаев