“БАСТАҢҒЫДА” БАС ҚОСТЫ

Қостанай қаласындағы Наурыз мейрамының шырайын келтірген айрықша шара – "Бастаңғы" театрландырылған ұлттық шоуы. Былтыр тұңғыш рет ұйымдастырылып, биыл жарасымды жалғасын тапқан жастардың ойын-сауық думаны екі күн қатарынан салтанат құрды.

Қазақ халқының бұл ежелгі дәстүрінің қайта жаңғыруына облыстық мәдениет басқармасы себепші болып келеді. Былтыр жоғары деңгейде өткен аталмыш шара осы жылы жаңаша мазмұнмен өрбіді. Яғни бұл жолы жастар жайсаң жеңге мен әзілқой қайнының аулына қонақ болды.

Әсем ән мен әуезді күй, әдемі қалжың, ұлттық ойын-сауық көрермендердің көңіл-қошын келтірді. Тағы бір ерекшелік – кешке өзге ұлт өкілдерінің өнерпаздары да қатысып, бір шаңырақ астындағы татулығымыздың жарқын үлгісін көрсете білді. "Бастаңғы" сценариінің тұрақты авторы, белгілі ақын Абылай Маудановтың айтуынша, бастаңғы қостанайлықтар асыға күтетін шараға айналып үлгерген.

«Бастаңғыны» қостанайлықтар әз-наурыздың бір нақышы ретінде қабылдай бастапты. Бұл өте қуантады. Былтырғы «Бастаңғыдан» соң дәл сондай форматтағы қойылым бірнеше мекемеде өткен еді. Биыл да солай боларына сенеміз. Былтыр іс-шараның мәні сөз жүзінде айтылса, биыл іс-жүзінде көрініс тапты. Демек, әуелде діттеген мақсатқа бір қадам болса да жақындадық деген сөз", – дейді ол. Жалпы, бұл шарада көрер қызық аз болған жоқ. Ән-күй шашудың сыртында, сиқыршы бала өнері, сұлулық байқауы, қуыршақтар күресі, жілік сындыру сыны көпшіліктің қошеметіне бөленді. Осылайша, ұлттық мәдениет заманауи форматта назарға ұсынылды. Сценарий авторының сөзінше, мұның өзіндік мән-маңызы бар.

«Ұлыстың ұлы күні Қыдыр ата мен Қорқытты, Асан қайғыны қашанғы түйеге мінгізіп жүре береміз? Қазақтың бәрі қалаға келіп жатыр, қаланың үйіндегі мереке қалай тойлану керек? Міне, осы сұраққа жауап іздеп, өзімізше бір тың форма ұсындық. Сол үшін де аңғал ата мен ақкөңіл әже, әдепті жеңге мен әзілқой қайныны басты кейіпкер ретінде алдық. Қысқасы, жып-жылы романтикаға құрылды», – деді А.Мауданов. Ол "Бастаңғының" наурыз мейрамын думандатудың қостанайлық ерекшелігіне айналуы керек екенін алға тартады. Идея авторы Гүлден Молдахметова мен театр режиссері Дос Құбаш та бұл ұлттық-мәдени шара жыл сайын жалғасатынын айтты.