Әуесқойлар бәсекесі

Қаладағы «Сұңқар» спорт кешенінде Наурыз мейрамына орай қазақ күресінен намазхандардың арасында жарыс өтті. Оның өткізілуіне Қостанай облысының Діни проблемаларды зерттеу орталығы, облыстық мешіт және «Социум & Мен» қоғамдық ұйымы мұрындық болды.

Палуандар екі салмақ дәрежесінде (жетпіс келіге дейінгі және одан жоғары) кілемге шықты. Айта кетейік, бұл жолғы бәсекеге облыстың аудан-қалаларынан әуесқой спортшылар қатысты.  

Жарыс нәтижесінде жетпіс келіге дейінгі салмақта жүлделі үшінші орынды Рүстем Құрамысов пен Медет Иманғалиевтер алса, екінші орын Есболат Жұмабайға бұйырды. Осы салмақтың бас жүлдесі Рудный мешітінен қатысқан Медеу Азнабаевтың қоржынында кетті. Жарыстың бас төрешісі Серік Дәрменбаев айтқандай, Медеу Азнабаев қырыққа келсе де өзінің жылдам екенін байқатты.

Келесі салмақтың «қоласын» Мейрамбек Мұқанов пен Олжас Қожахметов қанжығасына байлады. Ақтық белдесуде Сәтжан Сиязов тәжірибелі Абай Әбдіркеновтен айласын асырды.            

– Осы жарысты өткізудегі мақсатымыз жастарды ұлтжандылыққа тәрбиелеу болған еді. Бұған дейін осы бағытта бірнеше облыстық жарыс ұйымдастырдық. Бүгінгі намазхан жігіттердің өнеріне көпшілік риза болды деп ойлаймын. Кейбірінің жасы үлкен палуандарға мәрттік танытып, жол бергендері де жарасымды. Аталмыш бәсеке жыл сайын өткізіледі, –«Социум & Мен» қоғамдық ұйымының төрағасы Марат Жұрқабаев. 

Суреттерді түсірген Бағдат Ахметбеков