Аймақ басшысы облыстың оңтүстік өңірлерінде

Қостанай облысының әкімі Архимед Мұхамбетов оңтүстік өңірлерге іссапармен барды.

Аймақ басшысы бірінші кезекте «Әулиекөл – Жалдама» автожолының алғашқы 50 шақырымын және 200-257 шақырым аралығындағы учаскені орташа жөндеу жұмыстары барысымен танысты. Қазіргі уақытта асфальт төсеу жұмыстары жүргізіліп жатыр. Жұмыстарды осы жылдың қараша айында аяқтау жоспарлапы отыр.

Бұдан соң өңір басшысы Амангелді ауданындағы көп функциялы туристік кешеннің құрылысымен танысты. Ол жеке қаражат есебінен салынып жатыр. Кешеннің құны – 1,5 млрд теңге. Жоба аясында 12 нысанның құрылысы қарастырылған. Олар – мұражай, кафе, сақ саунасы, қонақ үй, туристік фирма, жазғы амфитеатр, спорт және балалар алаңдары және басқалары. Жобаның жалпы ауданы – 70 мың шаршы метр.

Бүгінгі таңда 11 нысанның іргетасы салынып, 3 нысанның қабырғалары қаланған. 5 нысанға су құбыры тартылды, екі септик орнатылды және 5 нысанға кәріз жүйесі жүргізілді.

Сондай-ақ, облыс әкімі Жангелдин ауданының Торғай ауылындағы А.Байтұрсынұлы мен М.Дулатұлының әдеби мұражайына жасалып жатқан ағымдағы жөндеу жұмыстарын көрді. Ахаң-Жахаң музейінде ағымдық жөндеу жұмыстарына 33,6 млн теңге бөлінген. Мұражайдың төбесі, шатыры, едені және су құбыры ауыстырылып, қабырғалары сырланып, қоршаулар, бейнебақылау, сыртқы жарықтандыру құрылғылары орнатылады және ішкі есіктерді алмастырылмақ. Мұражайда 8 экспозиция залы болады.

Сондай-ақ, өңір басшысы бүгін Жангелдин ауданы мен Арқалық қаласының бірқатар нысанын аралап жатыр. Ол туралы кейінірек ақпарат беріледі.

 

Суреттерді түсірген Бердіболат Көркембаев