Қызмет көрсетудің оңтайлы тәсілі
Қазіргі ақпараттық технология өріс алған заманда мемлекеттік қызмет түрлерін алудың тәртібі мен тәсілдері туралы халықты хабардар ету деңгейін арттыру жаппай қолға алынып жатқан науқан. ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің облыстық Депаратменті де мұндай шараны өткізуге мұрындық болып келеді. Осы аптада Қостанайдағы «Мирас» мәдениет сарайында өткен «Мемлекеттік көрсетілетін қызметтер жәрмеңкесі» соған дәлел. Айта кетейік, мұндай жәрмеңке Департамент тарапынан осымен үшінші рет ұйымдастырылып отыр.
Аталған шара аймақ тұрғындарына жұмыспен қамту, жер қатынастары, тұрғын үй-коммуналдық шаруашылығы, сәулет, мемлекеттік қызмет саласында мемлекеттік қызметтерді алу тәртібі туралы кеңес алуға мүмкіндік береді. Сол себепті, бұл салалардағы көптеген мәселелерді білу азаматтардың сұранысына ие екендігін ескеріп, оларға кеңес беру, соның ішінде жеке қабылдау үшін мемлекеттік органдардың басшылары өздері келіп қатысты.
Бүгінгі уақытта азаматтарды жиі мазалайтын сұрақтардың бірі жер қатынастары саласына қатысты. Қазір оның да мәселесі шешіле бастаған. Бұл туралы облыстық жер қатынастары басқармасының бөлім басшысы Жандос Қабиболла айтып берді:
– Жер қатынастары басқармасына қатысты жергілікті атқарушы органдар тарапынан 12 мемлекеттік қызмет түрі көрсетіледі. Бүгінгі акция барысында біз халыққа біздің сала көрсететін қызметтердің тек қағаз жүзінде емес, сонымен қатар электронды портал арқылы да қол жеткізуге болатынын кеңінен түсіндірудеміз. Біз азаматтарға үйден шықпай-ақ, интернет арқылы қызмет түрлерін алуға немесе халыққа қызмет көрсету орталықтары арқылы жүзеге асыруға болатынын айтқымыз келеді. Оның қиындығы жоқ. Сіз электронды үкімет порталына кіріп, тізім бойынша көрсетіліп тұрған салалардың ішінен өзіңізге қажет қызмет түрін таңдайсыз. Сол жерде өтініш толтырасыз. Ол үшін сіздің электрондық цифрлық қолтаңбаңыз болуы шарт. Бәрі ойдағыдай өткен соң анықтамалық құжат сіздің электрондық жеке кабинетіңізге келіп түседі, – деді.
Ж.Қабиболла электрондық қызмет алудың көптеген артықшылықтарын атап өтті. Алдымен, уақыт жоғалтпайсыз, сарсылып мекемелердің есігін тоздырмайсыз, қағазбастылықтан арылтады. Ең бастысы, бұл қоғам кеселі – жемқорлықтың жолын кесетін бірден-бір тәсіл.
– Акция тұрғындарға соттылықтың болуы немесе болмауы туралы, жылжымайтын мүлікке тіркелген құқықтар (ауыртпалықтар) және оның техникалық сипаттамалары туралы, жылжымайтын мүліктің жоқтығы (болуы) туралы анықтамалар алуға, сондай-ақ электрондық цифрлық қолтаңба туралы ақпараттар алуға кеңестер беруде. Мемлекеттік органдардың өкілдері өз қызметі жайында бейнероликтер көрсетіп, бүктеме-брошюралар, парақшалар таратып жатыр, баннерлерге мемлекеттік қызметтерді алу тәртібі туралы көрнекі ақпараттарды орналастыру арқылы көрсетіп отыр, – деді ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің облыстық Департаменттің баспасөз хатшысы Аида Бажирова.
Қыдырбек ҚИЫСХАНҰЛЫ
