Есімі мектепке лайық-ақ

Облыс орталығында Ғазиз қажы Әмірхановтың 90 жылдығына арналған «Абыройы асқан асыл азамат» атауымен ғылыми-практикалық конференция өтті. Жерлесіміз белгілі ұстаз, Қазақстанның білім беру ісінің үздігі, Қазақстанның еңбек сіңірген мұғалімі, «Құрмет» грамотасының иегері, дін қайраткері, қоғам беделдісін ұлықтаған шараға аймағымыздың білім басқармасы мұрындық болып отыр. Әрине, есімі күллі шартарапқа жайылған тұлғаны еске алып, жылы лебізін арнай келгендер қатары көп. Өңіріміздің мектептері және жоғары оқу орындарының басшылары мен өкілдері, ғалымдар, Ғазиз ақсақалдың көзін көрген замандас, жерлес ағайыны, ізбасарларымен қатар, Астана мен Алматыдан келген қос академик шәкірті бар.

 

Ғазиз Әмірханұлы Ұлы Отан соғысы аяқталып, елдің еңсесін енді көтерген тұсында халық ағарту саласын жандандыруға келген жан. Ол кезде майдан жасына жетпеген түбіт мұрт жастар бір-екі жылдық, одан қалды, 7-8 сыныптық біліммен-ақ мұғалімдік жолды бастап кете береді. 40-50-ші жылдардағы мектептердің жеткіліксіздігі, оқу құралдарының тапшылығы, отын-судың жоқтығы, әсіресе, тәжірибелі мұғалімдердің соғысқа кетуі үлкен қиындық тудырды. Осындай ауыртпашылық күндерде Меңдіқарадағы педагогикалық училищені тамамдаған жас Ғазиздің алдында дәріс алған алғашқы оқушыларының бірі – Қазақстанның бұрынғы Су шаруашылығы министрі Нариман Қыпшақбайұлы. 

           

– Ғазиз ағайымыз өте зейінді, зиялы, ұйымдастырушылық қабілеті зор, кісілермен ортақ тіл табысып алатын көпшіл азамат еді. Ұстаздығы өз алдына бір төбе, Торғайдағы рухани саланы бар күш-жігерін сала көтеріп кетті. Туған жерінің жетістігін, ол елден шыққан тұлғаларды паш етуге жаны құмар еді. «Халық жауы» атанған талай абзалдарымыздың есімін әйгілеуге қосқан үлесі мол. 1994 жылы Өзбекстанның Ферғана облысының Қазақстандағы мәдени күндері Торғайда өтті. Ғазиз ағамыз өзбек ағайындарға елді өзі таныстырғаны әлі есімде. Біз Ғазекеңмен өмірінің соңына дейін үзбей хабарласып отырдық. Ол кісі үнемі елде өтетін, қолға алынған қоғамдық-рухани шаралар жөнінде айтып отырушы еді, – деді қоғам қайраткері.

            Ал экономика ғылымдарының докторы, академик Сайлау Байзақов ұстазын талайымыздың өмірге үлкен қанат қағып кетуімізге зор септігі тиген адам екенін есіне алды:

            – Біздің оқушы кезіміздегі теледидар да, радио да, кино да – ұстаз болатын. Егер Ыбырай атамыз Торғайда алғаш болып мектеп ашып «Кел, балалар оқылық!» десе, Ғазекең өзі басқарған Қаратүбек орта мектебінің бірінші түлектері – 47 баланың тең жартысын Алматыға өзі жетектеп апарып, олардың жоғары оқу орнына түсуіне ықпал жасады. Сол жолы топ болып түскен суретіміз менің жұмыс кабинетімде 50 жылдан бері ілулі тұр. Ғазиз Әмірханұлының есімі өзі басқарған сол Қаратүбек (Тәуіш) орта мектебіне берілсе деген кезіндегі академик Фазылхан Бейімбетовтің ұсынысына мен де қосыламын. Бұл мәселе алда шешімін табады деген сенімдемін.

Айтпақшы, конференциядағы баяндамалар мен еліміздің, аймағымыздың әр өңірінен келген ғалымдардың, зерттеушілердің, ұстаздардың, авторлардың мақалалары «Абыройы асқан асыл азамат» атты жинағына енгізіліп отыр.

Жиын соңынан әулет ұрпақтары алыстан-жақыннан келген ағайынға дастархан жайып, Ғазиз қажының рухына құран бағышталды.

          Қыдырбек ҚИЫСХАНҰЛЫ

Суреттерді түсірген Бағдат АХМЕТБЕКОВ