Жағалау жаңа кейіпке енеді

Қостанай облысының әкімі Архимед Мұхамбетов Тобыл өзені жағасын абаттандыру жұмысымен танысты.

Қала әкімінің орынбасары Олжас Нұрғалиевтің айтуынша, сол жақ жағалаудағы құрылыс жұмыстары аяқталып қалған. Биыл 430 млн теңгеге өзен бойындағы 220 метр аумақты жөндеу жоспарланып отыр. Оның сөзінше, жағалау маңындағы ескі үйлер құрылысқа кедергі келтіруі мүмкін.-Әуелі тұрғындардың келісімімен ескі үйлерді сүру керек. Заңның аясында керекті сомасын төлеңдер. Үй иелеріне өтемақысын беріңіздер. Өзен жағасына жақын үйлердің қоршауларын бірдей қалыпқа келтірген жөн. Қазір бәрі ала-құла және қоқыс қаптаған. Оған демеушілерді тарту қажет. Көмектессін!- деп тапсырма берді өңір басшысы.Бұдан соң Архимед Мұхамбетов арнайы велосипед жолын салуды ұсынды. Сондай-ақ, жағалаудағы жолдардың кескін-сызбасы әкімдіктің ресми сайтына ілінеді. Дуалдардағы суреттерді көрген әкім бұл бастаманы қолдайтынын айтты.

-Мұның барлығы қаланың көркі үшін. Содан соң сапалы тастармен төсеу керек. Сонымен қатар, құмдағы волейбол, футболды дамытуға болады. Жалпы, жағалауда спорт алаңдары көп болуы тиіс. Келер жылы тағы да 200 метр ары қарай созып, жүгіру жолағын жасайық,- деді Архимед Бегежанұлы.Айта кетейік, жағалаудағы құрылыс 63 696 шаршы метр аумақты құрайды. Жоспар бойынша, 1 қарашада алғашқы нысандар тапсырылады.

Затобол кентіндегі жағалаудың құрылысы да бітуге таяу. Жағалау жоспарлары бір-біріне ұқсас. Айтып өткеніміздей, мұнда да спорттық жаттығу құралдары қойылмақ. Қостанай ауданы орталығында бірқатар ішкі жолға жөндеу жасалыпты. Мәселен, Ленин көшесі толықтай күрделі жөндеу жұмысынан өткен. Жергілікті кәсіпкерлердің қолдауымен «Туған жер» бағдарламасы аясында кенттегі аулалар қалыпқа келтірілуде. Үйлердің сыртын сырлап, балалар алаңқайы жаңа кейіпке енбек. Аулаларға бейнебақылау орнатылады.

Өңір басшысы қала шетіндегі «Кәріс көпірінде» де болды. Жолаушылар көлігі және автомобиль жолдары басқармасының басшысы Ғылымбек Шахметов мұндағы екіжолақты жолдың орнына төртжолақты өтпе жол салынатынын мәлім етті. Көпірдің ұзындығы – 250 метр.

-Жоба құны 116 млн теңге шамасында болады. 15 желтоқсан күні бұл аумаққа арнайы сараптама жасалады. Негізі 2019 жылы көпірді қайта жаңартатын боламыз,- деді басқарма басшысы. Архимед Мұхамбетов көпірдің құрылыс-монтаждау жұмыстарына келесі жылы кірісуді тапсырды.

 

Кенже ҚОНЫСБАЙ

Суреттерді түсірген Бағдат АХМЕТБЕКОВ.