Көлік тонап, күнін көрген
Андрей колледжді бітіргенімен жұмысқа орналасуға асыққан жоқ. Өзінің жұмыс істемейтін жолдастарымен бірге шатхана, компьютер клубтарында уақытын ойын-күлкімен өткізетін. Бірақ, осының бәріне ақша қажет бол-ғандықтан Андрей оңай жолды іздестірді.
Бірде Андрей дүкеннің қасынан өтіп бара жатқанда ашық тұрған машинаны көрді. Ол машинаның алдыңғы орындығында қалып қойған сөмкені ұрлап әкетті, оның ішінде ақша мен құжат бар екен. Осылай ақша табу Андрейге оңай көрінді. Жас жігіттің ендігі «жұмыс орыны» қаладағы супермаркеттердің жанындағы машиналардың тұрақтары болды. Жүргізушілердің абайсыздан ашық қалып қойған машиналарын тонап, әртүрлі заттар мен ақшаны алып кететін.
Құқық қорғау органдары көп ұзамай Андрейді құрықтады. Қостанай қалалық №2 соты оны Қазақстан Республикасы Қылмыстық кодексі 175 бабының 2-ші бөлімі бойынша 3 жылға бас бостандығынан айырды.
Андрей Қостанай қаласының қылмыстық-атқару инспекциясының бақылауына алынды. Андрейге жұмысқа орналасу, жұмыс пен оқудан кейін тұрғылықты мекенжайы бойынша болу, көңіл көтеретін орындарда жүрмеу сияқты міндеттер жүктелді.
Қостанай қаласының қылмыстық-атқару инспекциясының материалы бойынша дайындалды.
