Құрбан Айт – құтты мереке
Бүгін күллі мұсылман баласының ардақты мерекесі – Құрбан Айт басталды. Ұлық мейрамды асыға күткен қостанайлық мүмін қауымы да таң алдында мешітке жиналып, парыз етілген Айт намазын оқыды.
Бұл – ізгі амалмен Жаратушыға жақындай түсіп, сансыз сауапқа кенелетін қасиетті мейрам. Пенделік пен мәрттіктің, сараңдық пен жомарттықтың сынға алынар шағы. Құрбан шалу – Ислам дінінің ең ұлы рәсімдерінің бірі, Айт намазы оқылып болған соң және үш күнге ұласатын ташриқ күндерінде Алла үшін орындалатын ғибадат. Бәрімізге мәлім болғандай, биылғы мереке 1-3 қыркүйек аралығында аталып өтеді.
Құрбан Айттың алғашқы күні мұсылмандар таңертеңнен облыс орталығындағы қос мешітке жиналды. Иін тірестіріп, Айт намазын оқып, бірін-бірі ортақ мейраммен құттықтады. Мұнан кейін Алла разылығынан үмітті ағайын құрбан шалу рәсіміне ниет қойысты.
Айта кетейік, Қостанай қаласы аумағында құрбан шалу орны болып Екатеринбург-Алматы тас жолының 543 шақырымында орналасқан «Костанайский Агропродукт» ЖШС төңірегіндегі №1 құрылыс маңы белгілен еді. 
Ережеге сәйкес, сойылған мал етінің үштен бірін мұқтаж жандарға, тағы бір бөлігін туған-туыстарына беріп, қалғанын өзіне қалдыруы керек. 
Құрбан Айт қабыл болсын, қадірменді жамағат!
