«Жібек жолы» Қостанайға жетті

«Жібек жолы-2017» халықаралық авторалли қатысушылары Қостанайға келіп жетті. Темір тұлпар тізгіншілері Мәскеуден бастап Қытайдың Сиань қаласына дейін жүріп өтпек. Бұл әлемдегі ең ұзын ралли болып есептеледі, оның қашықтығы – 9068 шақырым. 40 елдің спортшылары Қостанайға дүйсенбіде келіп, әуежай маңында аялдады. Экипаждарды алда әлі ұзақ сапар күтіп тұр.

Жетінші рет ұйымдастырылып отырған ралли тарихи Жібек жолының бойымен жүріп келеді. 22 шілдеде мәре сызығы кесілуі тиіс. Маршрут үш ел аумағын – Ресей, Қазақстан және Қытай мемлекеттерін басып өтеді. Бұл аса маңызды спорттық оқиға үш елдің тарапынан да ортақ қолдау тапты. Өйткені, халықаралық шара – тек бағзыдағы керуен жолдарын жаңғыртуды ғана емес, қоңсылас мемлекеттердің достығын, ынтымағын нығайта түсуді көздейді.

Бұл бәсекеде Қазақстан атынан «Iveco PowerStar» жүк көлігін тізгіндеген Артур Ардавичус бақ сынап жатыр. Осы көлікпен белгілі шабандоз Жерар Де Рой былтыр «Дакарда» топ жарған болатын. Міне, Ардавичус та бұл тұлпарға разы.

-«Ивеко» тепе-теңдікті жақсы сақтайды. Бұрылыстарда ауытқымайды. Сәл қысқалығы болмаса, техника өте төзімді,-дейді спортшы.

Бұл спорт көлігіне қостанайлықтар ерекше қызығушылық білдірді. Өйткені, аталмыш компания өнімі біздің қаладағы «АгромашХолдинг» зауытында құрастырылады. Артурдың жүк көлігі әзірге жарап тұр. Ол әуелгі этапта  мәреге 6-шы болып жетсе, екінші кезеңде үздік үштіктен көрінді.     

Француздың атақты шабандозы Стефан Петерансель де қазақ жеріне деген өз ықыласын білдірді:

-Бұл жақта жер тегіс, ойпаттар аз. Сондықтан спортшыларға қиын соқпады, осы кезеңдерде көрсеткішті жақсартып алу керек. Қонақжайлықпен қарсы алған қазақ бауырларға алғысымды білдіремін,-дейді ол.

Тобыл өңірі шабандоздарды асқан қонақжайлықпен қарсы алды. Олар бір күн аялдап, келесі күні Әулиекөл ауданына қарасты Дүзбай ауылынан Астанаға бет алды. Бұл бағытта темір тұлпар тізгіншілері 855,69 шақырымды бағындырмақ. Ат-көлік аман жетсе, елордалықтар оларды ерекше сән-салтанатымен тосып алмақ. Айта кетейік, «Жібек жолы-2017» раллиі Балқаш пен Алматыға да аялдайды. Ең соңғы нүкте – Сиань қаласы.

Суреттерді түсірген Бағдат АХМЕТБЕКОВ.