Қостанайлықтар Астана күнін тойлады (ФОТОРЕПОРТАЖ)

Елорданың туған күнін бүгін Тобыл тұрғындары да кеңінен атап өтті. Бұл күні қаланың бірқатар аудандарында мерекелік мәдени-спорттық шаралар ұйымдастырылды.

 

Күндіз қала қонақтары мен тұрғындары мотожарыс пен сити орталықта өткен жастардың флешмобын тамашалады. Ал, кешкісін мерекелік шара орталық алаңда ұйымдастырылған «Арман қала – Астана» атты концерттік бағдарламаға ұласты. Онда жергілікті өнерпаздар ән айтып, би биледі. Еңселі Елордамызға арналған бұл мерекелік шара да орталық алаңға жиналған көпшілікке ерекше көңіл-күй сыйлады.

 

Астана – санаулы жылдар ішінде сәулеті мен дәулеті келіскен ірі ресми, мәдени, рухани орталыққа айналды. Бүгінде әлем Астананы Қазақстанмен егіз ұғым ретінде танитын болды. Атаулы датаға арналған мерекелік шарада жиналған жұртшылық та әлем бойынша ең жас қаланың 19 жыл ішінде бағындырған биік белестері жайлы тамсана сөз етті.

 

-Әлемдегі әрбір адамның өз елінің астанасын мақтан тұтары сөзсіз. Мен де елімнің елордасын мақтан етемін. Сондықтан, Сарыарқа төсіне қанат жайған шырайлы шаһар әрбір қазақтың мақтанышы деп білемін. Келбетіне өзге жұрт қызыға да, қызғана да қарайтын Астанамыз жыл санап көркейіп, гүлденіп, ажарланып келеді. Бүгін міне, біз де Астанаға барып тойламасақ та, Елордамыздың туған күнін өз жерімізде атап өтіп жатырмыз. Бас қаламыздың және Елбасымыздың туған күні құтты болсын. Еліміз тыныш, жұртымыз аман болғай, – дейді қала тұрғыны Болат Есжанұлы.

 

Осылайша, қостанайлықтар да сәні мен салтанаты жарасқан Сарыарқаның төсіндегі айбынды Астана күнін ұйымшылдықпен қарсы алды. Орталық алаңға жиналған көпшілік ару қалаға арналған мерекелік бағдарламаны тамашалап, көтеріңкі көңіл-күймен тарқасты.

 

Қарлығаш ОСПАНОВА

Суреттерді түсірген Бағдат АХМЕТБЕКОВ.