Көрмеге қанша қаржы жұмсалды?

Сарапшылар EXPO көрмесіне қанша қаражат жұмсалғанын есептеді, – деп хабарлайды Ranking.kz сарапшылары. Сонымен, Қазақстан 5 жыл ішінде EXPO 2017 көрмесіне 565,1 миллиард теңге немесе 2,1 миллиард доллар бөлген.

Сарапшылар Қаржы министрлігінің мәліметтеріне сүйене отырып, көрмені өткізуге 2016 жылы мемлекеттік бюджеттен 267,2 миллиард теңгенің немесе бюджеттің үш пайызы бөлінгенін айтады. Ал 2015 жылмен салыстыратын болсақ, ол кезде көрмеге 154,2 миллиард теңге бөлінсе, 2017 жылы 77,3 миллиард теңге бөлінген.

"EXPO 2017 көрмесіне республикалық бюджеттен 2013 жылы 20,3 миллиард, 2014 жылы 46,1 миллиард, 2015 жылы 154,2 миллиард, 2016 жылы 276,2 миллиард, 2017 жылы 77,3 миллиард теңге бөлінді. 2016 жылы бюджет шығындарының рейтингінде EXPO көрмесі 13-орында тұр", – дейді сарапшылар.

Сондай-ақ, мамандардың айтуынша, еліміздегі әрбір салық төлеушінің үлесі 66 мың теңге болған. Осылайша, EXPO көрмесі еліміздегі Отын энергетикалық кешенін дамыту қорына жиналған қаражаттан 30 миллиард теңгеге көп ақша жинаған.

Халықаралық рекордтар жайлы айтатын болсақ, сарапшылардың айтуынша, ең қымбат EXPO көрмесі 2010 жылы Қытайдың Шанхай қаласында (60 миллиард доллар) өткізілген. Ал 2015 жылы Миланда өткізілген көрмеге 3,6 миллиард доллар кеткен екен.