Стадион жаңа кейіпке енеді
Рудный қаласындағы «Горняк» жастар спорттық клубының стадионында ауқымды жөндеу жұмыстары басталды. Еуразиялық Топ пен Қостанай облысы әкімдігінің өзара әріптестік туралы Меморандумы бойынша бұл мақсатқа 42 миллион теңге бөлінген.
Спорт нысаны 1980 жылы мәскеулік жазғы Олимпиада ойындарының құрметіне салынған болатын. Соңғы жаңарту жұмыстары 2011 жылы жүргізілді. Ол кезде жүгіру жолына тартан төселіп, футбол алаңында жасанды жамылғы пайда болды. Айналаны абаттандыру жұмыстарына да көп көңіл бөлінді. Дегенмен заман талабына орай және алда келе жатқан маңызды спорттық оқиғаларға байланысты «ССКӨБ» АҚ басшылығы стадионды қайта жаңғырту туралы шешімге келді.
– Тамыз айында бұл жерде дәстүрлі облыстық «Тың-Целина – 2017» спартакиадасы мен 2018 жылы Еуразиялық Топ кәсіпорындарының жұмыскерлері арасында ERG спартакиадасы өтеді. Сол себепті бізді биыл ауқымды жұмыстар күтіп тұр. Атап айтсақ, ұзындығы 2 шақырым жүгіру жолы сапалы тартанмен ауыстырылып, баскетбол, волейбол алаңдары мен трибуналардағы барлық орындықтар жаңартылады. Факел құрылғысын да жаңғырту жоспарда бар. Себебі олимпиадалық алауды жағу – кез келген жарыстың ажырамас бөлігі. Сәтін салса, стадиондағы жөндеу жұмыстарын шілденің соңына қарай аяқтаймыз, – дейді «Горняк» жастар спорттық клубының директоры Эдгар Акопян.
Жүгіру жолақтарының жаңа жабындысы жеңіл атлеттерге бүртабанды аяқ киім киюге мүмкіндік беріп, жүгірістің сапасын жақсартатыны сөзсіз. Сондай-ақ, ең маңыздысы, резиналық жабынды сырғанап кетіп, құлаудан және жарақат алудан сақтайды дейді спорт мамандары.
– Туған қаламыздағы ірі спорт нысанын жаңарту – ERG-дың «Туған жер – Родные города» ұранымен қолға алынған стратегиялық бастамасының жарқын дәлелі мен жемісі. Бұл бастама Топ кәсіпорындары орналасқан аймақтарды кешенді түрде дамытуды көздейді. Соның ішінде Қостанай облысы да бар. Әкімдіктермен бірлесіп, қала тұрғындарының, біздің жұмысшылардың жайлы, әрі қауіпсіз өмір сүруі үшін қолдан келген бар шараларды одан әрі атқара бермекпіз, – дейді «ССКӨБ» АҚ президенті Береке Мұхаметқалиев.
Қуаныш ЕСҚАБЫЛ
