Абыз ақсақал Шәңгерей Жәнібеков Қостанайда

Қостанай жеріне көрнекті мемлекет және қоғам қайраткері, жерлесіміз, еңбек ардагері Шәңгерей Жәнібеков келді. Заманында елінің,  Тобыл өңірінің дамуына зор үлес қосқан азаматпен облыс әкімі   Н.Садуақасов кездесті. Бұл кездесуден соң облыстық ардагерлер кеңесінің ғимаратында жанға жайлы сырласу кеші ұйымдастырылды. Бүгінде тоқсанға келген ардагер атамыз құр қол емес, жерлестеріне қос бірдей кітабын ала келіпті.

Кездесуді облыстық ардагерлер кеңесінің төрағасы К.Укин бұл шараны екі кезеңнің тоғысуы дей кетті. Шәңгерей Жәнібеков кездесуде өмір жолы жайында толғана әңгімеледі. Қостанай жеріне сағына жеткенін айта келе қаламыздың құлпыра түскенін жасырмады. Әсіресе Жеңіс саябағы танымастай өзгергеніне ризашылығын білдірді. Жастайынан ата-анасынан жетім қалған Ш.Жәнібековтің өмір жолы күреске толы. Бірақ талмас табандылықтың арқасында көпке қол жеткізген. Сұрапыл соғысты да көріп, елге аман-есен оралған ардагер аянбай еңбек етті. Көпшіл, іске келгенде талапшыл азамат Қостанай облыстық партия комитеті әкімшілік бөлімінің нұсқаушысы, партия, кәсіподақ, комсомол органдарында жауапты қызмет атқарды. Осы жылдарда туған жері Қостанай өңірінің гүлденуіне қосқан үлесі көп. Оның бұл еңбегін үзеңгілестері де ұмытпақ емес.

Ардагер жерлестеріне арнап қос бірдей кітабын ала келген. Оның бірі "Өнегелі өмір" деп     аталады. Бұл кітабында өзінің өмір жолы, түйгені мен көргені   топтастырылған.

Ақырын жүріп анық басқан, ақ адал, ерен еңбегімен ел сыйына бөленген Шәңгерей Жәнібеков бүгін де қоғамдық жұмыстарға белсене араласып жүр. Аға ұрпақ өкілінің жас ұрпаққа айтары да, берер өнегесі де  көп.

Айтолқын Айқадамова

Суретті түсірген Бағдат Ахметбеков