Астана төрінен тікелей эфир
Бүгін, 7 мамыр – Отан қорғаушылар күні. Дәл осы күні, сонау 1992 жылы еліміздің Президенті, бас қолбасшы Н.Назарбаев ҚР Ұлттық қарулы күштерін құру туралы заңға қол қайған еді. Міне, содан бері уақыт талабына сай жаңарып, жылдан жылға нығайып келе жатқан әскерімізге биыл 25 жыл толып отыр.
Осы айтулы датаға орай және Отан қорғаушылар күні мерекесіне байланысты облыстық филармонияда өткен мерекелік концертке облыс әкімі А.Мұхамбетов бастаған жергілікті шенеуніктер мен қарулы күштердің сарбаздары мен әскери қызметкерлері қатысты. Сондай-ақ, салтанатты шараға жиналған жұртшылық Астана төрінде өткен әскери парадты тікелей эфирден тамашалады. 
Мерекелік әскери шеруде сөз алған Елбасымыз аз уақыт өтсе де еліміздің қарулы күштері бес қаруы сай, заманауи үлгідегі айбынды армияға айналғандығын, ел қауіпсіздігінің басты бағыттары айқындалып, әскери доктринамыздың қабылданғандығын, бір сөзбен айтқанда экономикамыз қарқынды дамыған сайын еліміздің қарулы күштерінің де жетіліп, нығая түскендігін, біздің армиямыздың ТМД мемлекеттерінің ішінде алдыңғы қатардағы әскер ретінде танылғандығын ерекше атап өтті. Ал, көпшілік асыға күткен әскери шеруде Елордадағы “Қазақ елі” монументі алаңында Қазақстан Қарулы күштерінің бес мыңнан астам әскери қызметкері мен үш жүзге жуық техникасы жүріп өтті. 
Әскери авиацияның да тікұшағы мен ұшақтары аспанда қалықтады. Заманауи әскери құрылымдардан бөлек көпшілікке Ұлы Отан соғысы кезіндегі техника да көрсетілді. Ал, әскери марштар шерудің көркін ашса, әуедегі шоу әскери шерудің ең ұмытылымас сәті болды десек те болады.
Осылайша, Елбасының құттықтау сөзін тыңдап, әскери шеруді тамашалаған қостанайлықтар да елдің қауіпсіздігін қамтамасыз ететін қорғаныс күштерінің мығым екеніне тағы бір көз жеткізді. Әскери техникаларымыздың қуаттылығын көріп, ерекше әсер алғандарын да айтты.
Асхат МЫРЗАХМЕТОВ, республикалық “Ардагерлер одағы” ұйымының Қостанай облысы бойынша филиалының төрағасы:
-Бүгінгі шеруден біздің еліміздің қарулы күштерінің мықты екендігін көрдік. Қазіргі заманға сай қару-жарақтармен қамтамасыз етіліп жатқанын көріп, қатты қуандық. Алла бетін аулақ қылсын, бірақ елімізге қандайда бір қауіп төнетін болса, әскери күштің тойтарыс бере алатынына сенімдіміз. Елбасымыздың саясатын толықтай қолдаймыз. Кезінде 1992 жылдан 2001 жылға дейін жоғарғы қолбасшымыз Н.Назарбаевтың бұйрығымен тәжік-ауған шекарасын қорғап, абыроймен елге оралған едік. Ешқашан соғыс деген болмасын, заманымыз тыныш, еліміз аман болсыншы. Өз басым бүгінгі әскери шеруден үлкен әсер алдым деп айта аламын, өйткені бұл – Қазақстан азаматының рухын көтеріп, намысын оятатын шеру деп ойлаймын. Барша қазақстандықтарды ҚР Қарулы күштерінің 25 жылдық мерейтойымен және Ұлы Жеңіс мерекесімен құттықтаймын.
Қанат САНИЯЗ, Қостанайдағы 6697 әскери бөлімінің сарбазы:
-Биыл ҚР Қарулы күштеріне 25 жыл толып жатыр. Осы мерейтоймен және Ұлы Жеңіс күні мерекесімен еліміздің барша сарбаздарын, барша ардагерлерімізді құттықтаймын. Мен өзім Қарағанды облысының Теміртау қаласынан Қостанай жеріне келіп, осындағы 6697 әскери бөлімде Отан алдындағы борышымды өтеп жатырмын. Өмірімде алғаш рет осындай мерекелік жиынға қатысып, мерекелік шеруді тамашалап жатырмын. Сондықтан, мерекелік шарадан алған әсерімді айтып жеткізу мүмкін емес.
Қарлығаш ОСПАНОВА
Суреттерді түсірген Айбек ЖҮЗБАЙ
