ЖҮЗ ІШІНДЕГІ ЖАЛҒЫЗ

Иә, сүйінші, ағайын! Қостанайлық жас домбырашылар халықаралық «Жаңа жұлдыз» байқауынан бас жүлдемен оралды. 100-ден аса домбырашы қатысқан сайысқа Қостанай облысының атынан қалалық балалар шығармашылық мектебінің өнерпаздары барған-ды. Олардың өнерін «Шабыт» өнер академиясының үйретушілері, танымал күйшілер бағалады.

Жеңімпаздардың жетекшілері – Наурызбай Әмірхамзин мен Жасұлан Нәмиялы. Айта кетейік, бұл екі күйші де біздің газет ұйымдастырған «Домбыра-думанның» арнайы сыйлығын иеленген.

– Дәстүрлі сайыстың бірінші кезеңінде кім мықтыны облыстан анықтадық. Ал іріктелгендер халықаралық байқауға Астанаға жолдама алды. Сондықтан жауапкершіліктің салмағы және бар. Сайыс үш топта өтті. Бір топтың өзінде 150 нөмір орындалды. Біз 64-ші болып шықтық. Сағат 9-дан кете пойыздан түстік. Түс әлетінде күйшілерімізді шақырды. Басында балаларда қобалжу болғаны рас. Кейін бір-бірін демеп, одан сайын рухтана түсті. Жарыс шарты бойынша бір нөмір 5 минуттан аспауы тиіс болатын. Біз ақылдаса келе 4-5 күйден попурри жасадық. Күй тартыстың элементтерін қатыстырып орындадық. Ұтып кеткен тұсымыз осы, – деп ағынан жарылды топ жетекшісі Наурызбай Әмірхамзин. 

Оның сөзін жалғаған Жасұлан Нәмиялы:

– Қазір домбыраны эстарадамен қосып ойнап жүр. Мен оған да қарсы емеспін. Бірақ, күй эстрадаға қосылғанда өзінің туа біткен тарихи, қазақи дыбысын жоғалтады. Өкінішке қарай, сұранысқа көбірек ие болып тұрғаны осы күйлер. Жұртқа дүңкілдеп тұрса болды. Бұл жақсы емес. Біз жас күйшілерге басқаша үйреткіміз келеді. Күй таза, табиғи болуы тиіс. «Жаңа жұлдыз» сияқты байқаулар оқушыларға күйдің құдіретіне одан әрі тереңдеуге септігін тигізеді, – деді.

 

 

Алдияр Сүйіндіков домбыра үйірмесіне былтырдан бері барады. Ата-анасы Данияр мен Гүлнар да баласының қадамын әрі қарай қолдамақ. Бұйырса, Алдиярды өнер мектебіне жібермекші. Олардың айтуынша, жас ұрпақ күй арқылы салт-дәстүр, тіл мен ділден айырылмайды.

 

Қасқырбай ҚОЙШЫМАНОВ

Суретті түсірген Бағдат Ахметбеков