Жаңа фильмнің тұсаукесері өтті

27 сәуірде еліміздің барлық кинотеатрларында актер Азамат Сатыбалдының «Бір сен үшін…» фильмі прокатқа шықты. Отандық мелодраманың тұсаукесері Алматы мен Астанада басталып, Қостанайда жалғасып отыр. Тобыл өңірінде өткен салтанатты шараға фильмнің шығармашылық тобы арнайы келіп қатысты.Туындының қоюшы-режиссері Ардақ Төлеубай, фильм директоры Сәкен Досхан, басты рөлдерді сомдаған артистер Азамат Сатыбалды, Әлімхан Мырзахан, Тынышгүл Сұлтанбердиева, Оразхан Кенебаев, Мағди Ерғали көрсетілімнің алдында жергілікті журналистермен кездесті. Брифингте түсірілім жұмыстарының өту барысы айтылды.

«Арман» кинотеатрындағы салтанатты тұсаукесерге Қостанай облысы әкімінің орынбасары Марат Жүндібаев, облыстық мәслихаттың хатшысы Сайлаубек Ещанов, мәдениет басқармасының басшысы Ерлан Қалмақов келді. Марат Қонысбайұлы актерлерді облыс әкімінің атынан құттықтап, жылы лебізін білдірген болатын.– Біздің өңірімізден елімізге белгілі өнер саңлақтары шыққан. Қазақ киносының алтын қорындағы «Аманкелді» фильмін алып қараңызшы. Тұңғыш туынды даңқты жерлесіміз Аманкелді Иманов пен оның сарбаздарының ерліктеріне арналған. Сондағы батыр бейнесін театр актері Елубай Өмірзақов сомдады. Бүгінде оның құрметіне облыстық филармонияға есімі берілді.
«Бір сен үшін…» фильмінің тұсаукесері салтанатты түрде өтуі Қостанай облысының мәдени саласындағы ерекше оқиға. Біріншіден, туындының бас продюсері Азамат Сатыбалды еңбек жолын  Қостанайдағы Ілияс Омаров атындағы қазақ драма театрынан бастаған. Екіншіден, мелодрамада жерлесіміз, актер Әлімхан Мырзахан басты рөлдердің бірінде ойнайды. Бүгінгі кеш қостанайлық артистердің республика және әлем сахнасына шығуына серпін береді деп сенеміз. Шығармашылық ұжымның жетістігі көбейе берсін. Қазақ киносының әлемдік деңгейде танылуына тілектеспіз,-деді Марат Жүндібаев.

Сол күні кинотеатрдың залы лық толды. Кейбір көрермендерге билеттің жетпей қалғанын да көрдік. Залдағылар артистерді ыстық ықыласпен қарсы алып, зор қошемет білдірді. Көпшіліктің өнер адамдарымен бірге естелік суреттерге түскенін де айта кетейік.
-Елбасымыз отбасы құндылықтарын бірінші орынға қояды. «Отан  отбасынан басталады» деген халық даналығы да тегін айтылмаған. Біздің топ осы тақырыпқа қалам тартып, махаббатты дәріптеу үшін «Бір сен үшін…» фильмін түсірді. Мен Қостанайға сағынышпен келемін. Қостанай  менің алғаш тұсауымды кескен жер. Бұл жерде ең алғаш, 20 жасымда «Абылай хан» спектаклінде ойнадым. Осындай кездесуді ұйымдастырған басшылыққа алғыс айтамын,-деді Азамат Сатыбалды.Тоқсан минуттық фильмнің идеясы – отбасыны сақтау. Мұндағы кейіпкерлер өмірдің өзінен алынған. Мәселен, немере сүйгісі келетін ата-әже, суррогат ана, бір перзентке зар болған ерлі-зайыпты, жазықсыз сәби. Қарап отырсаңыз, осының бәрі өмірде кездеседі емес пе?! Фильм қазіргі қоғамның ащы шындығын суреттеген. Кейіпкерлердің бәрі бақытты болғысы келеді. Сол үшін күреседі. Тағдырмен тіресеміз деп адасады. Әсіресе, басты рөлдегі Асхаттың отбасын қорғау үшін барын салуы кез келген адамға ой салары анық.Кейіпкерлер ұрпақ үшін жанталасады. Негізінде, біздің халқымыз бақытын баладан іздеген ғой. Фильмді көріп отырып хәкім Абайдың өлеңіндегі «Адамның бір қызығы – бала деген» дейтін жолдары еріксіз еске түседі.
Үміт. Сенім. Сүю. Бұл отбасын сақтаудың ең маңызды формуласы болса керек. Мелодрамадан осындай ой түйдік.

Қымбат ДОСЖАНОВА.
Суреттерді түсірген Бағдат АХМЕТБЕКОВ.