Жастар кеші көңілді

15 сәуірдің "Қозы Көрпеш-Баян сұлу күні" деген атпен мерекеленіп жүргеніне біраз болды. Әсіресе, қазақ жастары арасында кеңінен тойланады. Осы күнге орай Қостанайдағы «Толқын» студиясының қыз-жігіттері «Махаббат, қызық мол жылдар» іс-шарасын ұйымдастырды.

 

Мерекелік концерт «Март» сауда, ойын-сауық орталығында өтті. Өнерлі жастар Отанға, туған жерге, ата-анаға, сүйген жарға деген махаббат туралы көріністер қойып, лирикалық ән шырқады. Жігіттер жағы жеті ғашық туралы қызықты аңыз-әңгімелер айтты. Жас ақындар махаббат туралы авторлық өлеңдерін оқыды.

Концерттің бағдарламасындағы «Ғашықтар» қойылымы көрермендерге ерекше ұнағаны байқалды. Жиналған көпшілік бірнеше жұптың өнеріне тәнті болып, қолпаштап отырды. Қойылымнан соң ортаға асабаның шығуы күтпеген жағдай еді. Асаба тойдың көркін қыздыра түсті. Көрермендерді іс-шараға араластыру үшін әртүрлі ойындар ойнатты. Ойынның жеңімпаздарына және өнер көрсеткен жастарға «Баян сұлу» фабрикасының тәттілерін сыйлыққа берді.

 

Бұл концерт «Толқын» студиясының бастамасымен өткенін айтып кетейік. Студия Н.Островский атындағы қалалық кітапхананың жанынан құрылған болатын. Биылғы әз Наурызда тұсауы кесілген шығармалық топтың құрамына өлең, шығарма жазуға икемі бар ынталы жастар алынған.  

Қ.Досжанова

Суреттерді түсірген А.Жүзбай.