Дәстүрлі ән өнері ұлықталды

Дәстүрлі өнердің қаймағы саналатын қазақтың ән өнері – халқымыздың мерей тұтып, мақтаныш етер асыл мұрасы. Бүгінде рухани жәдігерлердің ішінде замана сүзгісінен өтіп, халқымыздың ежелгі рухын, тарихын, жан дүние сұлулығын, мейірімін, ізденісі мен махаббатын, іңкәр ықыласын бүгінгі ұрпағымызға жеткізетін ән байқаулары жетерлік. Солардың бірі Рудный қаласындағы «Алые паруса» халық шығармашылық үйінде өтті. Осымен жетінші мәрте ұйымдастырылған өнер додасында 30-ға тарта сайыскер қатысып, жас ерекшеліктері бойынша сынға түсті. Байқауда халық арасында кеңінен танымал «Әгугай», «Дудар-ай», «Ай қаракөз», «Қамажай», «Балқадиша», «Балапан қаз», «Көзіңнің мөлдірін-ай» әндері шырқалды. Ал «Әдемі қыз» туындысын бірден төрт үміткер таңдапты.

Әділқазы алқасының мүшесі, Е.Өмірзақов атындағы облыстық филармонияның қызметкері Азамат Мұқатов осы байқауға үшінші рет төрелік етіп отыр. Ол өнерпаздардың шеберлік деңгейі мен сахналық мәдениеті бірте-бірте көтеріліп келе жатқандығын алға тартады.

– Әрине, үлкен сахна мен мектептің сахнасын салыстыруға келмейді. Бірақ балаларда өсім байқалады. Байқаудың мақсаты – сол талант иелерін анықтап, ынталандыру, шеберлігі мен шығармашылығын дамытуға мүмкіндік беру. Мәселен, осы конкурстың өткен жылдардағы жүлдегерлері мектептердің, қалалық білім және мәдениет бөлімдерінің қолдауымен облыстық, республикалық ән додаларында топ жарды, – дейді ол.

 

Екі сағат бойы патша-көңіл көрерменді әсем ән мен тәтті күйге бөлеген байқаудың нәтижесі бойынша, 8-11 жас аралығында №13 орта мектептің оқушысы Мәншүк Сайдуллаеваға жететін жан болмады. 12-15 жас аралығында №21 мектептің оқушысы Айбике Таңатарова үздік деп танылса, 16 жастан асқан сайыскерлер арасында №5 гимназияның шәкірті Аина Сабигина мен Музыкалық колледждің студенті Ибраһим Дәулетовтің бағы жанды. Ибраһим қазақтың ұлттық домбырасымен ұмыт болып бара жатқан «Жекен жар» халық әнін нақышына келтіріп орындап, кешті әрлендіре түсті. Барлық жүлдегерлер мен қатысушылар «Алые паруса» халық шығармашылығы үйі ұсынған алғыс хаттармен және естелік сыйлықтармен марапатталды.

 

Қуаныш ЕСҚАБЫЛ,

Рудный қаласы