Күн тәртібінде – Жаңа Еңбек Кодексі

Рудный қаласына жұмыс сапарымен ҚР Парламенті Мәжілісінің депутаттары мен Денсаулық сақтау және әлеуметтік даму министрлігінің өкілдері келді. Басты мақсат – жыл басында қабылданған жаңа Еңбек Кодексінің орындалу барысымен танысып, осыған қатысты халықтың ұсынысы мен тілегін тыңдау.

Делегация, алдымен, «ССКӨБ» АҚ Соколов кенішінде болып, мұндағы атқарылып жатқан ауқымды жұмыстарды өз көздерімен көрді. Әрі қарай олар қала құраушы кәсіпорынның кадрларды оқытып, даярлау орталығын аралап, осында дөңгелек үстел өткізді. Жиынды Мәжілістің әлеуметтік-мәдени даму жөніндегі комитетінің төрайымы Гүлнәр Иксанова ашты. Ол өз сөзінде Жаңа Еңбек Кодексі құрылымы бойынша ескісін қайталайтынын, бірақ бірқатар баптар қысқартылғанын айтты.– Дегенмен, мұндағы өзгерістер тек сандық қана емес, сапалық жағынан да орын алды. Бүкіл еңбек қатынастарын реттеу мәселелері бойынша негізгі рөл енді ұжымдық келісімшартқа беріледі. Түрлі уақытта заңнама жұмыс берушінің де, қызметкердің де құқығын қорғауға бағытталған, – дей келе комитет осы нормаларды сақталуын қадағалауға, қажет болған жағдайда өзгерістер мен толықтырулар енгізуге дайын екендігін жеткізді.Мәжіліс депутаты Ирина Аронова Жаңа Кодекстің жобасын жасау оңайлыққа соқпағандығын жасырмады.

– Заңды әзірлеген министрлік мереке немесе демалыс күндерінде атқарылған жұмыс үшін өтемақы көлемін 1,5 коэффиценттен 1,25-ке азайтуды ұсынғанда халық қалаулылары бірден наразылық танытты. Себебі бұл қарапайым халықтың табысын азайтып, әлеуметтік жағдайына тікелей әсер етеді. Көптеген дискуссиядан кейін бұл нормалар ескі күйінде қалды, – деді ол.Айта кетейік, заң жобасын әзірлеу кезінде жұмысшы тобында болған «ССКӨБ» АҚ Кәсіподақ комитетінің төрайымы Татьяна Шерстобитованың көптеген ұсыныстары да ескерілусіз қалмады. Бұл, әсіресе, көп жылдар еңбек етіп, зейнеткерлікке шыққан жұмыскерлердің әлеуметтік жағдайына қатысты болды.

Дөңгелек үстел барысында комбинаттың жетекші мамандары да еңбек қатынастарына қатысты көкейдегі сұрақтарын қойып, қонақтардың тарапынан тиісті жауаптарын алды.

 

Қуаныш ЕСҚАБЫЛ