Ақындар ардақталды
Елордадағы Қостанай облысы күндері тағы да бір игілікті шарамен жалғасты. Сарыарқаның төсінде Тобыл-Торғай топырағынан түлеген белгілі айтыскер ақындарға құрмет көрсетілді. Ұлттық музей сахнасында қазақтың халық ақыны Қонысбай Әбіл мен Әсия Беркенова және Әселхан Қалыбековмен кездесу кеші ұйымдастырылды. Оған Қостанай облысының әкімі А.Мұхамбетов қатысты. Ол жиналған жұртшылықты Тәуелсіздіктің 25 жылдығымен құттықтап, ақындарды сый-сияпатпен марапаттады.
– Біз бүгін еліміздің мәдениетіне, қазақ халқының өнеріне зор үлес қосқан ақындарымызға құрмет көрсеткелі отырмыз. Биыл Қостанай облысына 80 жыл толды, осы орайда Қонысбай Әбіл мен Әсия Беркеноваға облыс атынан Құрмет медалін тағуға рұқсат етіңіздер, – деді облыс әкімі.
– Біз бүгін еліміздің мәдениетіне, қазақ халқының өнеріне зор үлес қосқан ақындарымызға құрмет көрсеткелі отырмыз. Биыл Қостанай облысына 80 жыл толды, осы орайда Қонысбай Әбіл мен Әсия Беркеноваға облыс атынан Құрмет медалін тағуға рұқсат етіңіздер, – деді облыс әкімі.
Кеш кейіпкерлерінің үшеуі де айтыскер ақындар. Суырыпсалмалық қасиеттерімен дүйім жұртты аузына қаратқан дарынды жандар. Бүгіндері үш ақынымыз да кітап жазып жатыр, сондай-ақ шәкірт тәрбиелеп, жас ұрпақты ақындықтың қыр-сырына бейімдеуде.
– Бұл басқосу Тәуелсіздіктің 25 жылдығына арналып отыр. Облысымыздың Астанадағы күндерін пайдаланып, өңірден шыққан белгілі тұлғаларға құрмет көрсетуді жөн деп санадық. Дәл осы күні Оңтүстік Қазақстан облысының күндері өтуде, сол себепті халық ақыны Әселхан Қалыбекованы да арнайы шақырдық. Осылайша, Елорда сахнасында қазақтың үш бірдей халық ақынының басын қостық. Қазақстандықтар ел Тәуелсіздігінің тұғырлануына рухани тұрғыда септігін тигізген тұлғаларды тануы керек, – дейді Қостанай облыстық Мәдениет басқармасының басшысы Ерлан Қалмақов.
Кенже ҚОНЫСБАЙ
