«Тамашада» болған дүрбелең
Кеше кешкісін Қостанай шаһарының қақ ортасында орналасқан «Март» сауда орталығындағы «Тамаша» супермаркетінде тосын жағдай болды. Атап айтсақ, осы жерге сауда жасауға келген қала тұрғынының супермаркет аузындағы заттарды сақтайтын ұяшықтарға қойып кеткен сөмкесі жоғалды. Бұған біздің фототілшіміз Бағдат Ахметбеков куә болған еді.
Осы оқиға бойынша облыстық ішкі істер департаменті баспасөз хатшысы Әділбек Нұрмахин бізге былай деп түсініктеме берді. Ол жерде ешқандай да ұрлық болмаған. Барлығы сауда жасауға келген қала тұрғынының қателігінен болыпты. Ол өзінің сөмкесін қойған ұяшықты басқасымен шатастырып алған. Сосын байбалам салып, тәртіп сақшыларын шақыртқан. Оқиға орын алған жерге жеткен полицейлер нысанға қойылған бейнекамералардың көмегімен азаматшаның заттарын қандай ұяшыққа қойғанын анықтап берді.
Жалпы біздің қаламызда жұртшылықтың алаңғасарлығынан осындай оқиғалар жиі қайталанып тұратын көрінеді. Сондықтан да, тәртіп сақшылары тұрғындардың ірі сауда орталықтарына барған кездерінде өз заттарына мұқият болуын сұрайды
Мешіт Ғазиз
