Біздің Думан осындай!
Қаңтар айының соңғы күндері еркін күрестен Ақтауда жастар арасындағы Қазақстан Чемпионаты жалауын түрген болатын.
136 балуан өтініш берген дүбірлі додаға еркін күрестің қыр-сырын жеттік меңгерген біздің Думан Бөлтіріков та бағын сынады. Қашан да қарсыласын қапы қалдыруды машық еткен жігерлі жас спортшымыз тек біреуіне есе жіберіп, екінші тұғырдан көрінді. Сөйтіп, ел үздіктерінің құрамына енді.
Жалпы, жерлесіміз жайында жақ ашар болсақ, ол біздің ауданның ғана емес, еліміздің атын шығарып жүрген азамат. Бұған дейін де талай додаларда топжарып, биік-биік белестерді бағындырды. Яғни, бала кезінен спортты жанына серік еткен спорт шебері ел, әлем чемпионаттарының бірнеше мәрте жеңімпазы атанды. Сарыкөлдік талантты жаттықтырушы Марат Жұмабаевтың төл шәкірті екендігін баршаға мойындатып жүр.
Біз де, Думанымыздың бұл жеңісіне ортақтасып, оған алдағы уақыттарда әлі талай асуларды бағындыра бер демекпіз! Себебі, оның дүйім елді думанға бастайтынына бек сенеміз!
Руслан Әлкеев
Сарыкөл ауданы
