Рәміздерді құрметтеу – ұлтты қастерлеу
Бүгінде Мемлекеттік рәміздер күні әрбір қазақстандықтың патриотизм мен елге деген мақтанышын оятатын мерекеге айналды. Көгімізде көк туымыз желбіреп, Елтаңбамыз бен Әнұранымызды бекіткен сәттен бастап, елдігімізді әлем жұртшылығы мойындай бастады. Қазақ үшін, оның ішінде елдіктің тірегін сақтаушы өскелең ұрпақ үшін қастерлі саналатын мерекені жанкелдиндіктер аудандық мәдениет үйінде “Менің Отаным – Қазақстан” атты акция аясында атап өтті.
Мемлекеттік Әнұран салтанатты түрде шырқалып, “Жаңа Қазақстанның Рәміздері” тақырыбында деректі фильм көрсетілді.
Акцияның ашылуында сөз сөйлеген аудан әкімі Асқарбек Кенжеғарин шараны өткізудегі мақсат – Тәуелсіз еліміздің ертеңгі тұтқасы болар жастардың бойында отансүйгіштікті, қазақстандық патриотизмді қалыптастыру және жастарды бабаларымыздың аманаты – қасиетті Тәуелсіздікті сақтай білуге, Отанын қорғауға дайын болуға, мемлекет рәміздерін қастерлеуге тәрбиелеу болып табылатындығын тілге тиек етті.
Ы.Алтынсарин атындағы орта мектебінің 10 сынып оқушысы Алтынай Ақтас мемлекеттік рәміздер жайлы өз ойын өрбітіп, сөз соңын жүректен шыққан жырларымен өрнектеді.
Н.Ахметбкеков атындағы мәдениет үйінің әншілері патриоттық әндермен акция көркін қыздырды.
Байбатыр Ахметбеков,
Жанкелдин ауданы.
