1 маусым- Халықаралық балаларды қорғау күні

Жыл он екі айдың жадыраған жаз айы да келіп жетті.  Оқушы балалар үшін демалыс күндері басталса, ал, мектеп бітіруші түлектерді ҰБТ күтіп тұр. Бәрінен де ең қызықтысы сол  жаздың бірінші күні- Халықаралық балаларды қорғау күні. Балалық шаққа саяхат мерекесі күні.

Осы күні облыс орталығында,  қаланың шағын аудандарында, сол секілді өңіріміздің барлық елді мекендерінде небір мәдени іс-шаралар, ойындар, сайыстар,   түрлі түсті бормен сурет салу  конкурсы, спорт жарыстары ұйымдастырылатын болады.  Мәселен, облыс орталығында балаларға арналған мәдени шаралар сағат   10.00-де басталып, кешкі сағат 20.00-ге дейін созылмақ. Атап айтсақ, Сити-орталықта «Әр күлкіде күн сәулесі» атты бағдарламасы аясында  би, «Зумба және балалар» флеш-мобы, «Бақытты балалар» сурет-жобасы, «Балалар және шығармашылық» интерактивті жоба өтеді. Сол секілді орталық саябақта «Күлкі- ең қымбат сый!» атты мерекелік бағдарлама ұйымдастырылады.  Ал, енді сағат 16.00-ден кешкі сағат 20.00-ге дейін орталық саябақта өтетін «Біз ғажайыпқа сенеміз» атты  мерекелік бағдарламасы барысында  Елена Иванцованың би мектебінің бишілері, «Пупавка» балалар тобы, «ПарКиО» шоу-тобының өнерлі балалары өздерінің өнерлерін көрсетеді. Осы ұйымдастырылатын мерекелік сайыстар мен жарыстарға белсене қатысқан балалар да құралақан қалмай, тәтті сыйлықтарға ие болатын болады.

Гүлназым САҒИТОВА