Мерзімдер межеленді

ҚР білім және ғылым министрі Ерлан Сағадиев 2015-2016 оқу жылының аяқталуы мен емтихан өткізу мерзімдері туралы бұйрыққа қол қойды.

Осы уақытқа дейін қабылданған қазақстандық мектептерде жаппай бес күндік оқу және оқу жылын ұзарту туралы шешімге қарамастан, биылғы мектептік цикл дәстүр бойынша 25 мамырда бітеді. Бұл барлық екі ауысымды жалпы білім беретін оқу мекемелеріне қатысты. 5-8 (9) және 10 (11) сыныптарда оқитындар үшін аралық аттестациялау 31 мамырда аяқталады.

Сонымен қатар, негізгі орта білімнің жалпы білім беру бағдарламасын игерген 9 (10) сынып оқушыларының қорытынды аттестациясы 30 мамырдан 15 маусым аралығында, ал жалпы орта білім бағдарламасын меңгерген 11 (12) сынып оқушылары үшін маусым айының 1-20 аралығында өтеді. 9 (10) сыныпты тәмамдағандар үш міндетті емтихан тапсыруы тиіс және тағы 1-2 пәннен таңдауы керек. ЖОО-на түскісі келген мектеп түлектері үшін Ұлттық бірыңғай тестілеу (ҰБТ) 2016 жылдың 1-15 маусым аралығында өтетін болады.