Қарғын суға қарсы шаралар

Өңіріміздің Қостанай, Рудный, Арқалық қалаларында, сонымен бірге Алтынсарин, Сарыкөл, Қостанай, Ұзынкөл, Таран, Федоров аудандарында жер асты сулары мен тасқын суларды сору бойынша жұмыстар әлі жалғасуда. Бұл туралы өңірдің төтенше жағдайлар департаменті хабарлады. Қарғын судың салдарын жою үшін штабтар, төтенше жағдай бөлімшелері, жергілікті атқарушы органдар мен мердігерлік ұйымдардың жұмысы ұйымдастырылған.

Тасқынға қарсы жеке құрамнан мыңнан астам адам, 349 техника, 150 су сору құрылғылары мен 8 жүзу құралы, соның ішінде ҚР ІІМ ТЖК Батыс-Қазақстан облысының ТЖД жеке құрамының 51 адамы мен 8 техникасы жұмылдырылыпты.

Қар ерігелі бері Қостанай, Сарыкөл, Ұзынкөл, Федоров аудандары мен Қостанай және Рудный қалаларында 109 үйді су басқан болса, қазіргі уақытта 104 үйде су сору жұмыстары аяқталыпты.

Төтенше жағдайлар департаментінің 11 сәуір күнгі мәліметі бойынша қоймалардағы су көлемі қалыпты деңгейден төмендегенін байқаймыз. Мәселен, Жоғарғы Тобылда 817 млн. м³ орнына – 587 млн. м³ (72%), Қаратомарда 586 млн.м³ орнына – 364 млн. м³ (62%) құрады. Қаратомар су қоймасынан судың келуінің төмендеуіне байланысты су жіберу көлемі секундына 70 текше метрден 25 текше метрге дейін төмендеген.

ТЖД мамандары облыстағы су тасқынының жағдайы бақылауда әрі тұрақты мониторинг жүргізіліп жатқанын, судан қауіп бар аумақтарда тәуліктік кезекшілік ұйымдастырылғанын хабарлады.