«Жүректен жүрекке!»
Арқалық қаласындағы Мұхтасиб Әлмұхамед молла мешіті ғимаратының алдында осындай атаумен қайырымдылық жәрмеңкесі өтті. Жәрмеңкені ұйымдастыруға мұрындық болған – мешіт алқасы мен мешітте діни сауат ашу курсында дәріс алатын қыз – келіншектер тобы. Жетекшісі – Диана Әлтанова.
Орайы келгенде айта кетсек, жақында қалалық мешітке жаңа наиб имам тағайындалған болатын. Наиб имам – "Нұр-Мүбарак" университетінің түлегі Есбол Хасенов. Ерлі-зайыпты дін өкілдері шарапатты істерімен көзге түсуде.
Ислам діні күнтізбесінде ерекше саналатын қасиетті Ережеп айында алғаш өткізілген шарада мешіт шәкірттері үйлерінен пісіріп әкелген бауырсақ, тоқаш, құрт, май, жент сынды тағамдарды төменгі бағамен саудаға шығарды.
Жәрмеңкеден түскен қаражат қаладағы балалар үйіне, әлеуметтік аз қамтылған отбасыларға күнделікті тұтынатын азық-түлік тауарларын әперуге жаратылмақ.
Мұрат Жүнісұлы
