Жүлделі жүйріктер

Жылда өтетін халықаралық “Алтын микрофон” байқауы биыл да өз жалауын көтеріп, бағын сынаған жас әншілерді іріктеу кезеңінен өткізді. Облыстық байқаудан жеңімпаз атанғандар енді 25-27 сәуірде өтетін халықаралық байқауда тағы бір бақтарын сынап көрмекші.

Балалар шығармашылық үйінде өткен іріктеу кезеңі қызу болды. Мұнда 5-17 жас аралығындағы “мен әншімін” дегендер жиналды. Шәкірттерін жетектеп жүрген жетекшілер де, балалар да қобалжулы. 25 наурыздағы іріктеуден өткендер екінші кезең – финалдық байқауға бағыт алған. Одан әрі жеңімпаздардың Гала-концерті. Осы жерде қазылар алқасы үздіктердің есімдерін атап, жас ерекшеліктеріне қарай марапаттап шықты.

 

Ересектер арасында бірінші орынға ие болған – Мәдина Дакишева. “Айқаракөз” және шетел тілінде бір ән орындапты. Отбасында әнге құмар жан болмаса да, осы бір қасиет Мәдинаның бойына қонған. Музыкалық мектепті тәмамдаған өнерлі қыз екі жылдан бері вокалмен ден қоя айналысып жүр. Бүгінгі жеңісі жетекшісі Раушан Торғаеваның жемісі дейді. Енді алда халықаралық байқау. Дайындалуға қазірден кірісу керек. Қуанышында шек жоқ. Құттықтап жатқандар да жетерлік. Тек осы сенімді ақтай білсе болғаны.

 

Қазылар алқасында отырған №1 музыкалық мектептің директоры Берік Оразалин: “Балалардың барлығы да өнерлі. Тек жетекші тарапынан репертуар таңдауда кемшін тұстары кездесіп жатады. Оның орнын толтырып, ескертулерді айтуды міндет етіп отырмыз. Ал, балалар жылдағыдай дайындалған, жеңіске деген ұмтылыстары жоғары”,- деген ойын білдірді.

Біз де алдағы дода әнші балғындарға тек сәттілік әкелсін деген тілектеміз.  

 

Айтолқын АЙҚАДАМОВА