Қара шаңырақтағы төл мереке
Наурыз мейрамын жоғары дәрежеде атап өтуді дәстүрге айналдырған облыстық «Қостанай таңы» газеті Ұлыстың Ұлы күнін бүкіл ұжым боп тойлады. Ежелден халқымызбен бірге жасасып келе жатқан мерекені былтыр өз табалдырығынан аттатып, ауыл-ауылға бөлініп, ұлтымызға тән қонақжайлықты көрсеткен-ді. Қазақы қалыпқа салсақ, «бір ауылдан түстеніп, бір ауылда қона жатып», редакция аппараты биыл «Рахат Лукум» шатханасында өзіндік ерекшелікпен тойлады.
Оюлы шапан, оқалы қамзол киген қыз-жігіттер әр дастарқанның әзірліктерін пысықтап, қонақ күтудің қамымен жүрді. Сүр ет пен тіл үйірер Наурыз көже, құрт пен жент, сары бауырсақ, тары-талқан, қаймақ пен қатық – жайылған бай дастарқанның басты нышаны.
Облыстық ішкі саясат басқармасының басшысы Жанділдә Мақанов, көрнекті ақын Серікбай Оспанұлы, «Костанайские новости» газетінің Бас редакторы Сергей Харченко, белгілі режиссер Ерсайын Төлеубай, танымал ақын Ақылбек Шаяхмет, өңірге белгілі кәсіпкерлер Нұрлан Бейсенбаев, Жақсылық Төлеубаев және І.Омаров атындағы Қостанай облыстық қазақ драма театрының әртістері, Қазақстанға еңбегі сіңген қайраткер Қонысбек Бегайдаров пен Зәмзәгүл Балтабаева, облыстық филармонияның күміс көмей әншілері, жалпы айтқанда, облыстың маңдайалды мақтаныштары біздің шығармашыл топты маңызды мерекемен құттықтай келді.
Алдымен, Наурыз мейрамының басты кейіпкері Қыдыр Ата ұдайы ұлттық нақыштағы дүниелерді насихаттайтын, ақпарат айдынындағы ақ желкен – баспасөз ұжымына батасын берді. 
«Қостанай таңы» газетінің Бас редакторы Жанұзақ Аязбеков пен төл басылымның абыз ақсақалы Сәлім Меңдібай ағаларымыз басқосуға келген қонақтар мен әріптестерін Ұлыс күнімен құттықтап, табыс тіледі.
Е.Өмірзақов атындағы филармонияның белді термешілері Манапбек Қадыров пен Талғат Молдағалиев домбырамен халық әндерін шырқаса, жас әншілер де өнерлерін паш етті. 
Таланттылардың тағы бір тобы ұлттық аспаптан күй күмбірлетті. Журналистер арқан тартысып, ұлттық жөн-жоралғы – беташар рәсімін көрсетті.
Осы тойдың бір ерекшелігі, шатхана төрінде шынайы шаралар көрініс тапты. Бас редактордың орынбасары Жұматай Кәкімжановтың кішкентай қызы – Назеркенің тұсауы кесілсе, газеттің жас тілшісі – Кенженің қалыңдығы Маржанға жеңгелері сырға салды. Осылайша, әз-Наурыз мерекесі бірнеше қуанышты жалғады.
Дастарқан басында мәнді-мағыналы әңгімелер айтылды. Ақын, драматург Ақылбек Қожаұлы «Наурыз» сөзінің түп-төркініне үңіліп, оның түркі тілінен шыққанын айтты. Ал, режиссер Ерсайын Төлеубай Наурыз мерекесінің дербес елімізде қайта жаңғырғанына тоқталды.
– Қыс қылышынан аман қалған жұрт бар ренiш-өкпесiн ұмытып, кiнәсiн кешiп, тек жақсы тiлектер тiлейдi. Көңiлдiң жаңаруы деген осы. Сондықтан да Ұлыстың Ұлы күні – мерекелердің мырзасы, тойлардың төресі, – деді ол.
«Рахат Лукум» шатханасының егесі, кәсіпкер Нұрлан Бейсенбаев қала аумағында қазақылықтың иісін аңқытқан айтулы жиынды ұйымдастырған ұжымға зор ризашылығын білдіріп, алғыс айтты.
Қасқырбай ҚОЙШЫМАНОВ.
Суреттерді түсіргендер Айбек Жүзбай, Бағдат Төлебай.
