Төрлет, Наурыз!
Бүгін ұлық мейрам Ұлыстың Ұлы күнін Қостанай шаһары ерекше сән-салтанатымен дүркірете думандатты. Орталыққа жиылған жұртшылықтың қарасы қалың. Ауа райы аса қолайлы да болған жоқ: қар ұшқындап, жел соғып тұрды. Дегенмен, күннің салқындығы мерекелік көңіл-күйге қаяу түсіре алмағандай. "Бұл қарлы жел – Құс қанаты" мен "Алтынкүрек" қой" десті үлкендер.
Облыстық әкімдік алдына жағалай қонған киіз үйлер маңы – қараң-құраң халық. Отаулар ауласын, ошақтардан шыққан түтінді, әр ұлттың ән-күйін, айқара ашық есікті ерсілі-қарсылы адамдар айналып өтіп жатқан жоқ. Қазан басынан тегін таратылып жатқан ыстық бауырсақ, Наурыз көже, палаудан ауыз тиюде.
Ал, басты сахнада – өңірге белгілі өнерпаздардың тартуы және балдырғандардың әзірлеген көңілді билері.
Қала тұрғындары мен қонақтарының қуанышын ортақтаспаққа облыс әкімі Архимед Мұхамбетов сахна төріне көтерілді. Ол өз сөзінде көктемнің ең көркем де асқақ мәртебелі мерекесімен шын жүректен құттықтады.
Мейрамның басты кейіпкері Қыдыр ата да дүйім елді аузына қаратып, қос білегін көтеріп, ақ батасын жолдады.
Мейрам көрігі одан әрі қыза жөнелді. Қоғадай жапырылған қауымға ән-күй шашуы шашылғанның үстіне шашылды.
Нақ осы кезде киіз үйлер сайысы қорытындыланды. Биылғы жеңімпаз – облыстық іскер әйелдер ассоциациясы. Төрелік еткен билік өкілдері шаңырағы ең сәнді, дастарханы ең дәмді аталмыш ақ үй егелерін ақшалай сыйлықпен марапаттады.
Жаңару мен жасарудың ғана емес, ауызбіршілік пен татулықтың мейрамында қуанышты тең бөлісіп, шат-шадыман болысқан ұлт пен ұлыстарға қарап көз қуанды, көңіл марқайды.
Бұл жолғы мерекеде орталық алаңда қазақ күресінен, аударыспақтан жүлделі бәсекелер болды. Қойды иыққа салып көтеруден жарыс ұйымдастырылды. Бұл туралы келесі материалымызға назар салыңыз!
Ж.Жүсіпбек.
Суреттерді түсірген Бағдат Ахметбеков.