Мықтыны мықты жеңер алысқанда… (ВИДЕО)

by Qostanaı tańy · 22.03.2016

Ұлыстың Ұлы күні ұлттық спорт ойындарынан бәсекелер ұйымдастырылды. Қазақ күресі, Аударыспақ, Қой көтеру, Асық ату, Тоғызқұмалақ пен Арқан тартыс сынды спорт түрлерінен көрермендер де, кәсіпқой спортшылар да сынға түсті.

Алдымен, Қазақ күресінен бастайық. Облыс орталығындағы торқалы тойда Тобыл-Торғай өлкесінің маңдайалды бозкілем шеберлері бәсекелесті. Спортшылардың бәрі бабында. Әз-Наурыз мерекесіне арналған дәстүрлі турнир екі дәреже бойынша өткізілді. Яғни, 80 келіге дейін және осы салмақтан жоғары спортшылар "Түйе палуан" атағы үшін белдесті.

Наурыз думанындағы палуандар бәсекесі жиналған жұртшылықтың назарын тез аударды. Шаршы алаңға шыққан спортшы жігіттердің тартысты күресі көрерменді желпінідіріп, қиқу-қошеметке ұластырды.

Жоғарғы салмақта қарсыластарын қапы қалдырып, ақтық бәсекеде кездескен өңірімізге танымал күресші, Қазақстанның бірнеше дүркін жеңімпазы, науырзымдық Ерлан Омаров пен Қазақ күресінен Азия чемпионы, әлуиекөлдік Тоқтар Жиентавтың бәсекесі тартысты өтті.

Айта кетейік, делебесі қозған халық ақтық сынға шыққан білектілерге бәс тікті. Бұл да шаршы кілемдегілердің мұқияттылығы мен жинақылығы үшін септік тигізгені сөзсіз-тін.

Қос қарсылас бір-бірінің осал тұсын аңдысып, кейде Ерлан ұпай алып, оза шапса, Тоқтар да одан айласын асырып отырды. Негізгі уақытта тең түскен қарсыластар үш минутқа созылатын шешуші қоян-қолтық күресінде ғана жеңімпазды анықтай білді. Тәжірибелі Ерлан палуан керекті сәтінде әккі амалын жүзеге асыра біліп, Тоқтарды тобығынан қағып сүріндірді.

Сөйтіп, жүлдеге тігілген 100 мың теңгелік ақшалай сыйлықты қанжығасына басып, Наурыз тойындағы "Түйе палуан" атанды.

Тоқтар Жиентаев екінші орынды қанағат тұтып, жүлдеге берілген қойды иеленді.

Сонымен қатар, ұлттық ойынымыз "Аударыспақтан" да қомақты жүлде қоры тігіліп, батыр ұлдар күш сынасты. Ат үстіндегі текетірес тартысқа толы болды.

Көрермендер арасынан суырылып шығып, бақтарын сынаған жігіттер де бар.

Алайда, тегеурінді қарсылық көрсетіп, жүлдеге екі жігіт қана жармасты.

Ақтығында Бағдаулет Асанов пен Дархан Садманов өнер көрсетті. Бұл күні бабы мен бағы қатар шапқан Бағдаулет жеңіске жетіп, 100 000 теңгеге ие болды.

Екінші жүлдені місе тұтқан Дархан Садмановқа Наурыз тойынан қойды сыйға тартты.

Бұдан өзге жиналған жұртшылық арасында асық ату, қой көтеру және арқан тартыс сияқты ұлттық ойындардан жарыстар ұйымдастырылып, бағалы сыйлықтар табысталды.