Оқушылар алғыс арқалап қайтты
"Алғыс айту" күні қарсаңында мемлекеттік тілде оқытатын Сарыкөл орта мектебіндегі «Жас Ұлан» ұйымының мүшелері қарияларға қол ұшын созды.
Бұл қайрымдылық шарасы барысында музыка пәнінің мұғалімі Маржанкүл Қайркенқызы бастаған бір топ оқушы Лысый отбасына барып, бір үйде тек екеуі ғана тұратын қарттар – Иван Архипович пен Лидия Клименьтиевнаның хал-жағдайын білді. Олар үй жинау, ыдыстардың шаңын сүрту, гүлге су құю сынды жұмыстарды атқарып, үлкендердің ризашылығына кенелді.
Сондай-ақ, тәрбие ісінің орынбасары Әсем Жұмабайқызы бастаған келесі топ жалғызбасты ана – Қайреш Ағатаеваға жәрдемдесті. Оқушы қыздар әжейдің әр жұмысын бөліп алып, қолқанаттық көрсетті. Бірі үйдің шаңын сүртсе, енді бірі бөлмелерді сыпырып, қалғаны еденін жуып, қысқасы, үйдің ішін тап-тұйнақтай етті. Сондай-ақ, дарынды оқушы Мадина Валиева ән шырқап берді. Балалардың бұл ісіне жүзі бал-бұл жанып, жүрегі елжіреген ана алғысын жаудырды.
Руслан ӘЛКЕЕВ.
Сарыкөл ауданы.
