Халық қаҺарманы – Қостанайда

Ғарыш ілімі – қазіргі ғылым көшінің басында тұр. Қазақстан тарихында алтын әріппен таңбаланатын оқиғаның бірі – ұшқыш-ғарышкер Айдын Айымбетовтың ғарышқа жасаған ғылыми сапары. Ал Халық қаҺарманының Қостанайға келудегі негізгі мақсаты – жас ұрпақпен кездесу, олармен ой бөлісу, пікір алмасу.

Алдымен, Айдын Ақанұлы жастардың мол шоғырланған ортасы – А. Байтұрсынов атындағы Қостанай мемлекеттік университетіне соқты. Ұлы көсем – Ахаңның ескерткішіне гүл шоғын қойып, рухына тағзым етті.

– Қазақстан ғарыш саласын мейлінше зерттеуді ұмытқан жоқ, ал оны игеру – әлем елдерінің қолжетпес арманы. Осынау ғылыми-салалық ортада Қазақстанның мүмкіншілігі басымдыққа ие. Менің сапарым – қазақ халқының, Қазақстанның үлкен жеңісі. Жоспарланған эксперименттерді орындадым. Тағы да ұшуға дайынмын. Бала кезден біз де аспанға қарап, түнде жұлдыздарды санайтынбыз. Адам баласы ылғи ғарышқа ұмтылады, бірақ бәрі ұша бермейді. Ғылыми жағынан да, техниканың өркендеуі жағынан да ғарышпен шұғылданған өте дұрыс. Бала кезгі арманым орындалды, – деп ағынан жарылды ұшқыш.Содан соң ғарышкерді облыс әкімі Архимед Мұхамбетов қабылдады. Айдын Айымбетов аты аталған ғарыш сапарына кеткен шығын мен ғылыми-зерттеулер жемісін беретінін айтты. Қаһарманмен кездесу Достық үйінде жалғасты.

Еске сала кетейік,  Айдын Айымбетов ғарышқа «Союз ТМА-16М» кемесімен 2 қыркүйек күні аттанған болатын. Сапар барысында ол өзінің көңіл-күйімен, сезімдерімен Twitter парақшасында бөлісіп отырды, тіпті суреттер мен видеолар салды. Сондай-ақ, поляр шұғыласы мен шаңды дауылды түсіре алды. Ол ғарышта оншақты ғылыми эксперимент жүргізді. Сонымен қатар, Жер бетінің мониторингі және экологиялық апаттарды зерттеу бойынша да эксперименттер жүзеге асырды.

 

Қасқырбай Қойшыманов

Суреттерді түсірген Бағдат Ахметбеков