Жол тазартатын техниканы ұрлаған
Рудный қаласында белгісіз біреу жол тазартатын техниканы ұрлаған. Космонавтов-Парковая көшелерінің қиылысында қас қарайған кезде жол бойындағы автогрейдерді айдап әкеткен.
Қостанай облыстық ІІД-нің баспасөз қызметінің хабарлауынша, даладағы бейнебақылау таспасындағы жазбаларды қарау барысында оқиғаға қатысты адам анықталып, ұсталды. Ол Қамысты ауданының 36 жастағы тұрғыны болып шықты. Аталған фактімен ҚР ҚК-нің 200-бабының 1-бөлімі бойынша (Автомобиль немесе өзге көлік құралын ұрлау мақсатынсыз заңсыз иелену) сот алдындағы тергеу амалдары жүргізілуде.
Бап санкциясына сәйкес, қылмыскер бір мың АЕК-ке дейін айыппұл төлеп, немесе сол көлемдегі түзеу жұмыстары немесе екі жылға дейін бас бостандығын шектеу, сол мерзімге бас бостандығынан айыру жазасына кесілуі мүмкін.
