Шатырдан су ағып жатыр
Облыс орталығындағы Қайырбеков көшесі 371\1 мекенжайында орналасқан көпқабатты үй проблемадан арылмай-ақ қойды. Кешелі бергі күннің күрт жылынуынан үйдің төбесінен оныншы, тоғызыншы қабаттардағы пәтерлер мен дәліздерге су кетіп жатыр. Қазір осы үйдің еркек атаулысы тегіс таңертеңнен бері шатырда жүр. Олар қар аралас мұзды ойып, жерге қарай лақтыруда. Жігіттер мұзды қатты ұрғылауға қорқады, себебі оның астындағы рубероид тесіліп қалса, одан бетер су кетеді дейді. 
Ал әйелдер болса, үйдің бөлмелері мен дәліздегі суды кептіріп әлек. Қабырғамен бойлап өтетін суағар құбырлардың сыртымен де су кетіп жатыр. Жұртшылықта дәліздердегі электр есептегіштер мен ашық сымдарға ылғал жете көрмесін деген үрей бар.
– Жаздың жауыны мен қыстағы қардың ерігенінен әбден ығырымыз шықты. Әйтеуір төбеден су ақса болды – әуреге түсеміз. Қазір балалар жататын бөлмедегі жарыққа келетін сымның орнынан су сорғалап тұр. Немерелерді басқа бөлмеге ұстап отырмын. Бөлмелер сыз тартып кетті. Осы үйдің төбесін жазда жөндеп беріңдер деп әкімдікке, пәтер иелері кооперативіне айтумен келеміз, бірақ ешқандай нәтиже жоқ, – дейді оныншы қабат тұрғыны Айымгүл Тұяққызы.
Тұрғындар осы өткен қаңтар айының аяғында ғана Қостанай қалалық құрылыс бөліміне осы мәселені көтеріп хат жазған екен. 4 ақпан күні бөлім басшысы М.Қаратаев қол қойған жауап хат келіпті. Хатта құрылыс жұмыстарын жүргізген «Евростиль І» ЖШС кепіл мерзімі аяқталғаны жазылған және тапсырыс беруші тарап мердігер компанияны сотқа бергені келтіріліпті. Демек, алдымен мердігер серіктестіктің сапасыз төбе салғаны дәлелденеді. Одан кейін компанияға осы олқылықты жою міндеттеледі. Кез келген құрылыс жұмыстары, әсіресе, даладағы жұмыстар қыста емес, жаз шыға жүргізілетіні белгілі. Ал оған дейін көпқбатты үйдің тұрғындарына тамшылаған сумен алысып отыруларына тура келеді. 
Дәл осы Қайырбеков көшесіндегі 371\1 үйдің құрылысы басталмай жатып, небір дауға себеп болғаны бұған дейін жазылды да. 2013 жылы ерте көктемде тұрғындарға салтанатты түрде тапсырылуы тиіс нысанға пәтер иелері бір жыл кешігіп барып кірді. Одан кейін жұртшылық инженерлік-коммуникациялық жүйенің дұрыс жүргізілмегенін, кейбір пәтерлердің сылағы түсіп жатқанын айтып шағымданды. Ол аздай, көп қабатты тұрғын үйге көгілдір отын біразға дейін тартылмай, ол да айғай-шуға ұласқан болатын.
Қыдырбек ҚИЫСХАНҰЛЫ
