«Тобыл» командасы бәссауда өткізді
Жылдағы қалыптасқан дәстүр бойынша «Тобыл» командасы жаңа жыл қарсаңында қайырымдылық шарасын өткізді. Бәссауда осымен бесінші мәрте ұйымдастырылып отыр.
Бұл жолы танымал футболшылардың формаларын саудаға шығару арқылы команда Виктория Логинованың ем-домына 70 мың теңге жинап берді.
Бір жас бес айға енді толған сәби Лисаков қаласында тұрады. Дәрігерлер Виканың омыртқасы зақымданған деп отыр. Оны емдеп, жазу үшін 1 млн.800 мың.теңге ақша қажет көрінеді.
«Тобыл» футболшылары мұндай шарадан бей-жай қалған жоқ.Сатылымға он екі футболшылының киімдері мен ала доп шығарылды. Бәссаудаға түскен ең қымбат форма команда капитаны Нұрбол Жұмасқалиевке тиесілі. Оның футболкасы 21.000 теңгеге сатылды. Уче Калудың формасы 10.000 теңгеге өтсе, Игроь Зеньковичтің киген футболкасы-6.000 теңге, Сергей Явороский, Иван Садовничийлердің киімдері 5.000 теңгеден айналды.
Әлібек ЫБЫРАЙ
Суреттерді түсірген Айбек ЖҮЗБАЙ
