Жастардың «Алтын кітабына» жаңа есімдер қосылды

Қостанай облысы жастарының «Алтын кітабына» тағы да жаңа есімдер тіркелді. Әр саланың үздіктерін, жүйріктерін облыс әкімі Архимед Мұхамбетов құттықтап, марапаттады.

2005 жылы басталған бұл іс-шара биыл да жалғасын тауып отыр. Аталған салтанатты кездесуді облыстың жастары асыға күтеді десек әбестік болмас. Осы уақытқа дейін «Алтын кітапқа» 170 жас өскіннің есімі тіркелген. Үздіктердің қатарын биыл тағы да он лауреат толықтырып отыр. Марапат иелері өнер-білім, оқу-ғылым, спорт пен бизнес салаларында жетістікке жетіп, өңірдегі жастар саясатының дамуына атсалысып жүрген азаматтар.

-Халқымыз «Ақыл – жастан, асыл – тастан» деп жастарға үміт артқан. Жақында ғана ел тәуелсіздігінің 24 жылдығын тойладық. Осы жылдар ішінде республика жастары үшін жасалған қолайлы жағдайлар мен ұсынылып отырған мүмкіндіктер өскелең ұрпаққа деген қамқорлықтың нақты дәлелі. Егемендікке енді ғана қол жеткізген сәтте Елбасы «Болашақ» халықаралық бағдарламасын ұсынып, жастардың шетелде білім алуына жол ашты. Бүгінде осы бағдарламаға қатысқан азаматтар мен азаматшалар ел игілігі үшін әр салада қызмет жасауда,-деді облыс әкімі Архимед Мұхамбетов.

 

Салтанатты іс-шара қаладағы «Ақ шаңырақ» мейрамханасында болғанын атап өтейік. Оған облыстық басқармалардың басшылары мен ҮЕҰ-дың жетекшілері және «Алтын кітаптың» өткен жылдардағы лауреаттары қатысты. Сондай-ақ, республика халқының мақтанышына айналған боксшы Иван Дычко мен жергілікті «Тобыл» командасының футболшысы Нұрбол Жұмасқалиев та болды.

 

«Алтын кітаптың» білім саласы бойынша биылғы лауреаты – Мұрат Зайнуллин. Ол Арқалық қаласындағы Б.Майлин атындағы №3 орта мектепте директордың ғылыми-әдістемелік жөніндегі орынбасары болып жұмыс істейді. Еңбек жолын 2010 жылы бастаған. Биыл Петропавлда өткен педагогикалық олимпиадаға барып, жүлдегер атанды. Сонымен қатар республикалық деңгейдегі жеңістері де бар. Үздік атанған өзге де жастардың есімдерін газетіміздің алдағы сандарынан оқи аласыздар.

 

Қымбат Досжанова

Суреттерде: жылдың үздік жастарын марапаттау салтанатынан көріністер;

Суреттерді түсірген Бағдат АХМЕТБЕКОВ.