Қостанайда Қытай көліктері шығады

China National Machinery IMP.&EXP.CORP компаниясының президенті Ванг Сю Шенг бастаған бір топ қытай инвесторлары Қостанайдағы «СарыАрқаАвтопром» кәсіпорынында болды.

Мұнда үстіміздегі жылы JAC көлігі құрастырыла бастаған еді.Шетелдік кәсіпкерлер өндіріске қомақты қаржы салуға ниетті. Биыл тамыз айында «Группа Аллюр Авто» АҚ директорлар кеңесінің төрағасы Андрей Лаврентьев Бейжіңде алпауыт көлік компаниясымен өзара әріптестік орнату мақсатында екі ірі стратегиялық құжатқа қол қойғаны есте.

Қостанайда қытай көліктерінің құрастырыла бастауы сол келісімнің нәтижесі. Екі елдің іскерлік байланысы мұнымен шектеліп қалмақ емес. Алдағы уақытта кәсіпорын жұмысы еселене түсуі әбден мүмкін.Зауыт басшыларының айтуына қарағанда Қостанайда құрастырылған жеңіл көліктерді бірқатар шетелдерге экспорттау мәселесі де жолға қойылады. Келесі жылдың ақпан айынан бастап зауыт екі ауысымда жұмыс істейді. Яғни, «СарыАрқаАвтоПром» өзінің жұмыс ауқымын үш есеге дейіт арттыруды көздеп отыр. Бұл туралы AllurGroup компаниясының президенті Юрий Цхай мәлімдеді.

Облыс әкімі Архимед Мұхамбетов көлік бағаларының қарапайым тұрғындар үшін қолжетімді болғанын қалайтынын жасырмады.«Бағасы арзан болса, соғұрлым өтімді болады. Осы жағын қаперде ұстаған жөн»,-деді өңір басшысы инвесторлармен кездесуінде. А.Мұхамбетов қытайлық кәсіпкерлерге бірқатар ұсыныстар айтып, екі жақты келісімге орай, көлік құрастыру саласын жан-ж ақты дамытуға кеңес берді.

 

Айбек КӘДІРҰЛЫ
Суретті түсірген Бағдат ТӨЛЕБАЙ