Министрмен кездесу
Өңірімізге жұмыс сапарымен келген ҚР Білім және ғылым министрі Асхат Аймағамбетов Қостанай автомобиль көлігі колледжінде болды. Бұл туралы облыстық білім басқармасының басшысы Зәуре Бәйменова хабарлады.
Аталған оқу орны аймағымыздағы техникалық және кәсіби білім беретін озық мекемелердің бірі болып бекер аталмайды. Мұнда үздік кадрлық әлеует орнаған, «СарыарқаАвтоПром» ЖШС, «АгромашХолдинг», «Қостанай трактор зауыты» АҚ қатарлы сенімді әлеуметтік серіктестері бар дуалды оқыту жүйесі дамыған.
«Асхат Аймағамбетов еліміздің колледждерінде «Жас маман» жобасы бойынша құралдарды жаңғыртудың арқасында мамандарды даярлау жұмысының тиімділігін арттыруға жол ашылғанын атап өтті. Расымен де қазір студенттер ең заманауи құрылғылары бар жаңа лабораторияларда оқытылып келеді», – деді З.Бәйменова.
Министрдің оқытушылармен болған кездесуінде техникалық және кәсіби білім беру жүйесіне жаңашылдықтар енгізу мәселесі көтерілді. Педагогтер оқу-жұмыс жоспарларын әлеуметтік серіктестермен бірлесіп құрастырудың жүйелік жағынан тиімділігін, нақты жұмыс берушілер тарапынан маман даярлау бағытындағы оқу процесін икемдендіре түсетінін айтты. Ең бастысы, бұл түлектердің еңбек нарығында сұранысқа ие болуының жарқын көрінісі екені анық.
